Մարիամ և Երանուհի Ասլամազյան քույրերի պատկերասրահի խանութի բացումը

ԵՐԵՎԱՆ, 24 ՍԵՊՏԵՄԲԵՐԻ, Irates.am: Սեպտեմբերի 26-ին Մարիամ և Երանուհի Ասլամազյան քույրերի պատկերասրահում տեղի կունենա պատկերասրահի խանութի բացումը։ Թանգարանային խանութի նորարարական այս նախագիծը մարզային արհեստագործներին կապում է տեղական թանգարանների հետ` Հայաստանում թանգարանային խանութների նոր մոդելի փորձարկման համար:
Միջոցառման ներկաները հնարավորություն կունենան տեղում ձեռք բերել հայ վարպետների ձեռագործ աշխատանքները, որոնք հատուկ ստեղծվել են թանգարանի հավաքածուների ոգեշնչումից՝ հիմնված գունային երանգների և կտավների թեմատիկայի վրա։ Ներկայացված կլինեն նաև բնօրինակների վերարտադրումներ։

Աշխատանքներ ներկայացնող վարպետներն ինչպես Հայաստանի հինգ մարզերը ներկայացնող (Վայոց ձոր, Սյունիք, Լոռի, Տավուշ և Շիրակ) «Իմ Հայաստան» ծրագրի շահառուներն են, այնպես էլ՝ բաց հայտարարության կանչով հրավիրված հանրապետության այլ մարզերի արվեստագետներ և արհեստավորներ։

Մարիամ և Երանուհի Ասլամազյան քույրերի պատկերասրահում ներկայացված է Ասլամազյան քույրերի գեղանկարների, գծանկարների և խեցեգործական աշխատանքների ամենամեծ հավաքածուն՝ թվով 620 բնօրինակ աշխատանք: Այն Հայաստանի միակ թանգարանն է, որը նվիրված է կին արվեստագետներին: