Տեղեկություն չկա, թե ինչ վնասներ են կրել Արցախի պատմամշակութային շինությունները, Վանքասար եկեղեցին

ԵՐԵՎԱՆ, 15 ՀՈԿՏԵՄԲԵՐԻ, Panorama.am: «Ալ. Թամանյանի անվան ճարտարապետության ազգային թանգարան-ինստիտուտը կոչ է անում ICOMOS-ին և ICOM-ին միանալ պայքարին, գործադրել ամեն հնարավոր ջանք դադարեցնելու Ադրբեջանի ագրեսին ինչպես Արցախի ժողովրդի ու խաղաղ բնակչության, այնպես էլ նրա պատմության, մշակութային արժեքների ու ազգային ինքնության դեմ»,-նման կոչով հանդես է եկել Ալ. Թամանյանի անվան ճարտարապետության ազգային-թանգարան ինստիտուտը:

«Պատերազմն իր հետ բերում է մարդկային կորուստներ. մահանում են երիտասարդներ, որոնք ներկայի ու ապագայի սերուցքն են։ Մահանում է մի ամբողջ սերունդ։ Մարդկային կորուստներն անդառնալի են։

Ադրբեջանի սանձազերծած պատերազմի պատճառով մենք կորցնում ենք ոչ միայն մարդկային կյանքեր, այլև մշակութային և պատմական արժեք ունեցող կոթողներ։ Ադրբեջանն այդպիսով թիրախավորում է Արցախի տարածքում գտնվող ճարտարապետական շինությունները՝ կարծելով, թե այդպես կարող է ոչնչացնել Արցախի իրական՝ հայկական պատմությունն ու հետքը։

Այսօր արդեն վնասված է Շուշիի սուրբ Ամենափրկիչ Ղազանչեցոց եկեղեցին՝ կրկնակի հրթիռակոծությունից։ Այս պահին մենք տեղեկություն չունենք և չենք կարող գնահատել թե ինչ վնասներ են կրել Հադրութ, Մարտակերտ ու Մարտունի քաղաքներում գտնվող պատմամշակութային շինությունները, Մարտակերտի շրջանում գտնվող Վանքասար եկեղեցին։ Վտանգված է Տող գյուղում գտնվող Մելիք Եգանի տունը»,- նշված է արտարապետության ազգային-թանգարան ինստիտուտի հայտարարության մեջ:

Հիշեցնենք՝ սեպտեմբերի 27-ին ժամը 07:15-ի սահմաններում, Ադրբեջանը, օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական ողջ շփման գծով։ Հրետակոծվել են նաև խաղաղ բնակավայրերը, այդ թվում մայրաքաղաք Ստեփանակերտը, Մարտունին, Մարտակերտը, Հադրութը: Բնակչությանը կոչ է արվել պատսպարվել։ Երեք տասնյակից ավելի զոհեր կան քաղաքացիական բնակչության և հարյուրավոր զոհեր զինծառայողների շրջանում: Հոկտեմբերի 8-ին Ադրբեջանը հավածներ էր հսացրել Շուշիի սուրբ Ամենափրկիչ Ղազանչեցոց եկեղեցուն:

Թե Հայաստանում, թե Արցախում հայտարարված է ռազմական դրություն և ընդհանուր զորահավաք։