Դիսնեյի «Սառցե սիրտը» բարեգործական մուլտֆիլմ-ցուցադրությունը կյանքի է կոչվում բարերարների աջակցությամբ

Հայաստանի պետական սիմֆոնիկ նվագախմբի լավ բարեկամ, բազմամյա աջակից և շատ երկրներում իր գործունեությամբ հայտնի մշակութային բարերար Կոնստանտին Իշխանովը հերթական անգամ իր զգալի նպաստն է բերում Հայաստանի պետական սիմֆոնիկ նվագախմբի նոր նախաձեռնությանը, որն իրականացվում է «Սառցե սիրտը» մուլտֆիլմի ամանորյա բարեգործական ցուցադրություն-համերգի համակազմակերպիչների հետ։

Դժվարին օրերին նա ևս անձնական խոշոր նվիրատվությամբ միացել է դեկտեմբերի 24-27-ն անցկացվելիք ամանորյա բարեգործական համերգների ծրագրին, որի հանդիսատեսներն այս անգամ լինելու են արցախյան 44-օրյա պատերազմի հետևանքով տուժած ընտանիքների երեխաները։ Կոնստանտին Իշխանովը մշտապես եղել է մեր նվագախմբի կողքին՝ աջակցելով թե՛ Հայաստանում, թե՛ արտերկրում իրականացվող մեր կարևորագույն նախագծերին։ Նա «Մշակույթի աջակցության եվրոպական հիմնադրամի» հիմնադիր նախագահն է։ Մալթայում գործող հիմնադրամը հայտնի է տարբեր երկրներում մշակութային և կրթական նշանակալի նախագծերի կազմակերպման, իրականացման և աջակցության շնորհիվ։
Այսօր մեզ ցուցաբերված ցանկացած օգնություն կարևոր է մշակութային կազդուրիչ շունչ հաղորդող միջոցառումերի անցկացման համար։ Դուք նույնպես կարող եք միանալ այս բարեգործական նախաձեռնությանը և երեխաներին ընձեռել «Սառցե սիրտը» մուլտֆիլմ-համերգին մասնակցելու հնարավորություն՝ նվիրաբերություն կատարելով kids.sure.so հարթակի միջոցով:

Հիշեցնենք‚ որ Հայաստանում առաջին անգամ նոր ձևաչափով ներկայացվող Դիսնեյի «Սառցե սիրտը» բարեգործական մուլտֆիլմ-ցուցադրության կազմակերպիչներն են Հայաստանի պետական սիմֆոնիկ նվագախումբը‚ Կ. Դեմիրճյանի անվան մարզահամերգային համալիրը‚ Sure. օնլայն հարթակը, «Ներդաշնակ մանկություն» բարեգործական հիմնադրամը և Zapomni ընկերությունների խումբը։ Գլխավոր գործընկերն է Mastercard միջազգային վճարման համակարգը:

Աղբյուր՝  Irates.am