Աստղադիտարանի աշխատակիցների միաձայն որոշումը

Հունվարի 21-ին տեղի է ունեցել ՀՀ ԳԱԱ Վ. Համբարձումյանի անվ. Բյուրականի աստղադիտարանի կոլեկտիվի ընդհանուր ժողով, որի օրակարգում դրված է եղել աստղադիտարանի՝ ՀՀ ԳԱԱ կազմում մնալու հարցը։

Այս մասին տեղեկացնում են աստղադիտարանի մամուլի բաժնից, նշելով, որ նման օրակարգի պատճառը ՀՀ Ազգային ժողովի պատգամավոր Հովհաննես Հովհաննիսյանի նամակն է ԿԳՄՍ նորանշանակ նախարար Վահրամ Դումանյանին, որում նա առաջարկում է աստղադիտարանը հանել ՀՀ ԳԱԱ կազմից՝ տալով նրան հիմնադրամի կարգավիճակ։ Պայմանավորված այդ նամակով՝ ՀՀ ԳԱԱ նախագահությունը դիմել է ԲԱ աշխատակիցներին՝ վերջիններիս կարծիքն իմանալու համար։ Նույնանման նամակով Հ․ Հովհաննիսյանն ավելի վաղ դիմել էր Նիկոլ Փաշինյանին, և աստղադիտարանի կոլեկտիվն իր հստակ դիրքորոշումն էր հայտնել մնալ ՀՀ ԳԱԱ կազմում։

Ժողովի ընթացում Բյուրականի աստղադիտարանի տնօրեն Արեգ Միքայելյանը անդրադարձել է ԲԱ գործունեությանը, արդյունավետությանը, նվաճումներին և խնդիրներին։ Գիտաշխատողներն իրենց մտահոգությունն են հայտնել ստեղծված իրավիճակի մասին՝ համոզմունք հայտնելով, որ նման անհիմն նամակներն ուղղված են գիտության քայքայմանն ու արժեզրկմանը: 
Քվեարկության արդյունքում պարզ է դարձել, որ բոլորը միաձայն նպատակահարմար են համարում Բյուրականի աստղադիտարանի՝ ՀՀ ԳԱԱ կազմում մնալը։
«Բյուրականի աստղադիտարանն անկախ ներկա իրավիճակից շարունակելու է աշխատել իր բնականոն հունով՝ հանուն գիտության և ի շահ Հայաստանի»,- նշված է աստղադիտարանի մամուլի ծառայության տարածած հաղորդագրության մեջ։

Աղբյուր՝ Irates.am