Գորիս-Կապան հատվածում Ոստիկանության կողմից ուղեկցումների թիվն աճել է

ԵՐԵՎԱՆ, ՆՈՅԵՄԲԵՐԻ 1, Times․am: ՀՀ ոստիկանությունը Գորիս-Կապան ճանապարհահատվածում նախ ապահովում է քաղաքացիների անվտանգությունը, ապա ուղեկցումներ է իրականացնում: Հատկապես վերջին շրջանում եղանակային պայմանների հետ կապված՝ այդ ուղեկցումների թիվն աճում է:

Այս մասին լրագրողների հետ ճեպազրույցի ժամանակ ասաց ՀՀ ոստիկանապետի տեղակալ Արա Ֆիդանյանը:

«Առհասարակ ունենք խնդիր՝ կապված ոստիկանության ծառայողների թվաքանակի հետ: Այդուհանդերձ, կարողանում ենք այլ ծառայությունների ուժերով ուղեկցումներ կազմակերպել և մինչ օրս որեւէ խնդիր չենք ունեցել: Ուղեկցումներ են իրականացվում նաև Տաթևի ուղղությամբ: Գիտեք, որ այդտեղ տեղի են ունեցել բեռնատարների որոշակի կուտակումներ, բավականին մեծամասշտաբ աշխատանք տարվում է այդ հատվածում»,-հավելեց Ֆիդանյանը: