Ադրբեջանում ֆուտբոլի հանդիպումը վերածվել է իրավապահների եւ երկրպագուների բախման
Նմանատիպ
Ադրբեջանի թալիշաբնակ տարածաշրջանի կենտրոն Լենքորանում տեղի «Խազար Լենքորան» եւ Բաքվի «Նեֆթչի» ֆուտբոլի թիմերի միջեւ հանդիպումը, որն ավարտվել է ոչ-ոքի, վերածվել է երկրպագուների միջեւ բախման: Ինչպես հաղորդում է ANS PRESS-ը, խաղի առաջին կեսն ավարտվելուն պես դատավորի գործողություններից դժգոհ «Խազար Լենքորան»-ի երկրպագուները հավաքվել են Նեֆթչի-ի’ մոտ 50 երկրպագուների տրիբունաների առջեւ եւ թիմի դեմ լոզունգներ հնչեցրել:
Արդյունքում երկու կողմը սկսել են միմյանց վիրավորական արտահատություններ անել: Հետո նրանք ջարդել են նստարանները եւ նետել իրար վրա: Ոստիկանության աշխատակիցների միջամտությունն ավելի է կատաղեցրել տեղացի երկրպագուներին: Նրանք հրդեհել են խաղադաշտի մի հատվածը: Ոստիկանության եւ ներքին զորքերի զինվորների օգնությամբ դժգոհ երկրպագուների մի մասին հեռացրել են խաղադաշտից: Երկրորդ խաղակեսը սկսվել է ուշացումով: Խաղն ավարտվելուց հետո երկրպագուները չեն ցանկացել հեռանալ խաղադաշտից: Այդ ժամանակ բախում է սկսվել նրանց եւ իրավապահների միջեւ: Արդյուն քում ներքին զորքերի երեք զինծառայողներ, մեկ ոստիկան եւ մեկ երկրպագու վիրավորվել են:
Ոստիկանությունը ձերբակալել է տասնյակ տեղացի երկրպագուների: Բազմաթիվ երկրպագուներ դուրս են եկել Լենքորանի փողոցներ եւ փորձել անկարգություններ սարքել, բայց ոստիկանությանը հաջողվել է կանխել այդ փորձերը: Միջադեպի հետեւանքով խաղադաշտին մեծ վնաս է հասցվել:
Հետևեք մեզ նաև Telegram-ում