Մարին Լը Պենը Ղրիմը համարում է Ռուսաստանի մաս

ԵՐԵՎԱՆ, ԱՊՐԻԼԻ 13, Times․am: «Ազգային միասնություն» կուսակցության ներկայացուցիչ, Ֆրանսիայի նախագահի թեկնածու Մարին Լը Պենը հայտարարել է, որ նախկինի պես Ղրիմը համարում է Ռուսաստանի մաս։ Այս մասին նա ասել է ֆրանսիական BFM հեռուստաալիքի եթերում։

Բացի այդ, նա նշել է, որ չի ցավում Ուկրաինա մուտք գործելու արգելքի համար։ «Հիմա ես չեմ պատրաստվում գնալ Կիև, բայց իմ ընտրվելու դեպքում նրանք հնարավոր է փոխեն արգելքի որոշումը»,-հայտարարել է Լը Պենը։ Նա նաև ասել է, որ 2014 թվականին ԵՄ-ի կողմից իրականացվող պատժամիջոցները չվնասեցին Ռուսաստանին, բայց վնաս պատճառեցին ֆրանսիացի ֆերմերներին։

Ռուսաստան այցելելու կապակցությամբ Մարին Լը Պենը հայտարարել է, որ չի պատրաստվում հատել ռուսական սահմանը, մինչև Ուկրաինայում ռազմական գործողությունների ավարտը։