Կայացել է Ադրբեջանի ընդդիմության վերջին հանրահավաքը

Հոկտեմբերի 5-ին կայացավ Ադրբեջանի նախագահական ընտրությունների ընդդիմության միասնական  թեկնածու Ջամիլ Հասանլիի վերջին նախընրական ցույցը: 

Այն նախատեսված էր անցկացնել Բաքվի «Ինշատչիրլար» մետրոյի հարևանությամբ գտնվող մարզադաշտում:

Ինչպես տեղեկացնում է Haqqin.az լրատվական կայքը, ցույցը սպասվածից բազմամարդ է եղել: Ցույցին ներկա է եղել ընդդիմության որոշ ներկայացուցիչներ, որոնք սակայն գերադասել են հավաքվածների շարքերում մնալ: Իր վերջին հանրահավաքի ժամանակ Ջամիլ Հասանլին չի վայելել մի շարք ընդդիմադիր գործիչների աջակցությունը:

Անդրադառնալով իր հետընտրական պլաններին` Հասանլին նշել է, որ նախագահ ընտրվելուց հետո չի պատրաստվում կառավարության ներսում մասսայական փոփոխություններ կատարել:

Բայց միևնույն ժամանակ քննադատել է գործող իշխանություններին կոռուպցիայի և անարդյունավետ կառավարման համար:

Հանրահավաքն ավարտվել է անսպասելիորեն`  նախատեսվածից շուտ: