Ադրբեջանում գազի արտահանման ծավալները զգալիորեն կրճատվել են

Այս տարվա առաջին երեք ամսում Ադրբեջանից գազի արտահանման ծավալները կրճատվել են 33 տոկոսով, իսկ արտահանումից ստացվող եկամուտը’ 48,97 տոկոսով: Այս մասին հայտնում է Ադրբեջանի պետական վիճակագրական կոմիտեն:

Ադրբեջանական գազի արտահանման գինն անցած երեք ամսում միջինը կազմել է 177,65 դոլար, իսկ անցյալ տարի’ 229 դոլար:

Ըստ Ադրբեջանի պետվիճկոմի, առաջին եռամսյակում նավթի արտահանումը 5 տոկոսով կրճատվել է: Առաջին հերթին դա կապված է «Բրիթիշ Փեթրոլիում» (BP) ընկերության կողմից մշակվող նավթի հանքատեղիներում արդյունահանման ծավալների անկման հետ:

Հիշյալ ժամանակաշրջանում Ադրբեջանում գազի եւ գազի կոնդենսատի արդյունահանումը կրճատվել է 2,9 տոկոսով: «Ռոյթեր» լրատվական գործակալության համաձայն, դա կապված է «Ազերի-Չիրաղ-Գյունեշլի» հանքավայրերում գազի արդյունահանման ծավալների անկման հետ:

«Ազերի-Չիրաղ-Գյունեշլի» հանքավայրերում գազի արդյունահանման ծավալների անկումընսկսվել է 2011 թ., ինչի համար BP ընկերությունը Ադրբեջանի ղեկավարության կողմից խիստ քննադատության էր արժանացել: Այն ժամանակ բրիտանական ընկերությունը խոստացել էր նոր ներդրումներ ներգրավել եւ կայունացնել արդյունահանումը: Սակայն վիճակագրական տվյալները խոսում են այն մասին, որ նավթի արդյունահանման նվազման միտումը շարունակվում է: Իսկ դա, իր հերթին, խոսում է այն մասին, որ Ադրբեջանի կողմից ստացվող եկամուտը փոքրանում է: