Լուգանսկում եւ Դոնեցկում որոշեցին չհետաձգել հանրաքվեն

Լուգանսկում եւ Դոնեցկում որոշեցին չհետաձգել հանրաքվեն

Ուկրաինայի Լուգանսկի մարզի հանրային խորհուրդը որոշել է չհետաձգել տարածաշրջանի կարգավիճակի շուրջ մայիսի 11-ին նշանակված հանրաքվեն: Այդ մասին, ինչպես տեղեկացնում է «Արմենպրես»-ը, ՌԻԱ Նովոստիին հայտնել են հարավ-արեւելքի բանակի մամուլի կենտրոնում: Հանրաքվեն հետաձգելուց հրաժարվել են նաեւ Դոնեցկի մարզում: Այդ մասին հայտնել է Դոնեցկի Ժողովրդական Հանրապետության կառավարության համանախագահ Դենիս Պուշիլինը:

«Հանրաքվեն կկայանա մայիսի 11-ին, մենք պատրաստվում ենք, քվեաթերթիկները տպվում են, ամեն ինչ ուժի մեջ Է: Ոչինչ չի փոխվի, եւ ոչ մի հետաձգում չի լինի»,-ասել են հարավ-արեւելքի բանակի մամուլի կենտրոնում:

Դոնեցկի Ժողովրդական Հանրապետության կառավարության համանախագահ Դենիս Պուշիլինի խոսքով՝ հանրաքվեի հետաձգումից հրաժարվելու օգտին քվեարկել են միաձայն:

Ավելի վաղ ՈՒկրաինայի ազգային անվտանգության պաշտպանության խորհրդի քարտուղար Անդրեյ Պարուբին հայտարարել Է, որ Ուկրաինայի հարավ-արեւելքում ուժային հատուկ գործողությունը կշարունակվի՝ անկախ հանրաքվե անցկացնելու վերաբերյալ տարածաշրջանների որոշումից: Նրա խոսքով՝ այժմ ընթանում Է ուժերի վերախմբավորում, եւ բոլոր հիմքերը կան ասելու, որ հատուկ գործողությունը հաջողություն կունենա:

Նախօրյակին ՌԴ-ի նախագահ Վլադիմիր Պուտինը կոչ Էր արել Ուկրաինայի հարավ-արեւելքում ֆեդերալացման կողմնակիցներին՝ հետաձգել տարածաշրջանների ինքնորոշման շուրջ մայիսի 11-ին նշանակված հանրաքվեն, որպեսզի անհրաժեշտ պայմաններ ստեղծվեն երկխոսության համար: Դոնեցկում այսօր տեղի Է ունեցել ժողովրդական խորհրդի նիստ, որի ընթացքում քննարկվել Է հանրաքվեի հետաձգման վերաբերյալ ռուսական պետության ղեկավարի առաջարկը:

Մինչդեռ անհայտ անձինք Դոնեցկում անցած գիշեր ոչնչացրել են հռչակված Դոնեցկի Ժողովրդական Հանրապետության կարգավիճակի շուրջը հանրաքվեի անցկացման համար նախատեսված շուրջ 1 միլիոն քվեաթերթիկներ: Ըստ ականատեսների տեղեկատվության՝ անհայտ անձինք ներխուժել են տպարանի շենք եւ ոչնչացրել 800 հազար քվեաթերթիկ: Բացի այդ, շարքից հանվել են տպագրական սարքավորումները:

Համանման դեպք Է տեղի ունեցել նաեւ Դոնեցկի մեկ այլ տպարանում, որտեղից անհայտ անձինք հափշտակել են շուրջ 300 հազար քվեաթերթիկ եւ նույնպես վնասել են տպարանի սարքավորումները:

Միլիցիան հայտնել Է, թե ականատեսների վկայությունների համաձայն՝ հարձակումը կատարել են «Աջ հատված» ծայրահեղական կազմակերպության արմատականները:

Հետևեք մեզ նաև Telegram-ում