Թուրքիայի էներգետիկայի նախարարը խոստովանել է. Սոմայի ածխահանքում բացահայտ թերություններ են եղել

Թուրքիայի Մանիսայի նահանգի Սոմա քաղաքի ածխահանքում, որտեղ աղետի ժամանակ 301 հանքափոր է զոհվել, բացահայտ թերություններ և վնասվածքներ են եղել: Այս մասին, ինչպես հաղորդում են թուրքական ԶԼՄ-ները, հայտարարել է Թուրքիայի էներգետիկայի նախարար Թաներ Յըլդըզը:

Նախարարի խոսքով, Սոմայի ածխահանքում թերություններ լինելու հանգամանքն անվիճելի է: «Այդ իրադարձությունը լուրջ սպառնալիք է հանդիսանում: Ածխահանքում միջադեպը պետք է մանրամասնորեն հետաքննվի», -ասել է Յըլդըզը:

Մայիսի 13-ի գիշերը տեղի ունեցած պայթյունի արդյունքում Սոմայի աշխահանքում զոհվել են 301 հանքափոր եւ տուժել 486 մարդ:

Թուրքիայում ընդհանուր առմամբ 740 ածխահանքեր են գործում, որոնցում աշխատում է 48706 մարդ: 1941 թ. մինչ այժմ Թուրքիայի ածխահանքերում տեղի ունեցած արտակարգ պատահարների արդյունքում զոհվել են 3 հազարից ավելի մարդ, 100 հազարից ավելի մարդ տարբեր աստիճանի վնասվածքներ են ստացել: Թուրքիայի արտադրական ոլորտում տեղի ունեցող արտակարգ պատահարների 10,5 տոկոսն ընկնում է ածխահանքերին:

2014 թ. առաջին չորս ամսվա ընթացքում Թուրքիայի արտադրական ոլորտում տեղի ունեցած արտակարգ պատահարների արդյունքում զոհվել է 1235 մարդ, որնցից 103-ը’ կին: Թուրքիայի պատմության մեջ հանքերում ամենամեծ վթարներից մեկը տեղի է ունեցել 1992 թ. Զոնգուլդաքի նահանգում, որի արդյունքում զոհվել է 263 մարդ:

Սոմա քաղաքի ածխահանքում վթարի հետ կապված Թուրքիայում 25 մարդ բերման են ենթարկվել, որոնց մեջ են Soma Holding ընկերության տնօրենների խորհրդի նախագահը եւ ընկերության եւս 5 աշխատակիցներ: