5 մեդալ ըմբշամարտի Եվրոպայի առաջնությունում

Մեդալների հարուստ ավարով Եվրոպայի ըմբշամարտի առաջնությունից հայրենիք վերադարձան մեր պատվիրակները :

Ինչպես հայտնի է. ազատ ոճայինների պայքարում չեմպիոնի պատվին արժանացավ Դավիթ Սաֆարյանը / 66 կգ /: Հուսախաբ չարեց նաև նրա թիմակից Մուսա Մուրթազալիևը / 84 կգ /: Նա իր հաշվին հաղթանակներ գրանցելով նույնպես մտավ եզրափակիչ, որտեղ միավորներով զիջեց մրցակցին, գրավեց երկրորդ տեղը և արժանացավ արծաթե մեդալի:

Արայիկ Բաղդատյանի ղեկավարած Հայաստանի ազատ ըմբշամարտի հավաքականը թիմային պայքարում գրավեց վեցերորդ պատվավոր տեղը:

Մեդալների հաշվարկով լավագույն եռյակը եզրափակեց օլիմպիական չեմպիոն Լևոն Ջուլֆալակյանի գլխավորած Հայաստանի թիմը, որի հաշվին գրանցվեց երեք մեդալ:

Անպարտելի ըմբիշի տպավորություն ստեղծեց գյումրեցի Արթուր Ալեքսանյանը / 94 կգ /: Նա չափազանց վստահ մրցելույթներ ունեցավ, տպավորիչ հաղթանակներ տարավ իր բոլոր հինգ մրցակիցների նկատմամբ, գրավեց առաջին տեղը, պարգևատրվեց ոսկե մեդալով և երկրորդ տարին անըդմեջ հռչակվեց Եվրոպայի չեմպիոն: Պատվո պատվանդանի ,, բրոնզե ,, աստիճանին կանգնեցին Արթուր Շահինյանը / 84 կգ / և գերծանրքաշային Վաչիկ Եղիազարյանը:

Հայաստանի ազգային օլիմպիական կոմիտեն շնորհավորում է մեդալակիրներին , նրանց անձնական ու հավաքականների մարզիչներին, ըմբշամարտի հանրապետական ֆեդերացիային, մարզասերներին: Ուզում ենք հավատալ, որ հայ ըմբիշները կշարունակեն նպատակային մարզումները ու հաջողության կհասնեն նաև սեպտեմբերի 16 – 22 –ը Բուդապեշտում անցկացվելիք աշխարհի առաջնությունում:

Տեղեկացնում է ՀԱՕԿ-ի լրատվության բաժինը: