«Viva University». Մեկնարկային հնարավորություն՝ բուհերի ուսանողների համար

Տավուշի մարզի սահմանամերձ Բերդ քաղաքում ապրող Մարիամը տարբեր բուհերի 150 ուսանողի հետ մասնակցել է Վիվա-ՄՏՍ-ի «Viva University» (Վիվա յունիվերսիթի) կրթական ծրագրի ընտրական փուլին և ստացել սպասարկման կենտրոնում երկամսյա դասընթացի մասնակցելու հնարավորություն: Այժմ նա դասընթացների է մասնակցում հարազատ քաղաքում՝ Բերդում գործող Վիվա-ՄՏՍ-ի սպասարկման կենտրոնում:

«Երբ ես բաժանորդ էի, բավական հեշտ էր թվում աշխատանքը: Այժմ տեսնում եմ, որ այն ավելի բարդ է և ավելի պատասխանատու: Պետք է լինել պարտաճանաչ, հետևել բոլոր կանոններին, օրենքին, քաղաքակիրթ շփվել բոլոր տեսակի և խառնվածքի բաժանորդների հետ և լինել աշխատասեր: Հարկավոր է ոչ միայն եղածով բավարարվել, այլև ինքնակրթվել: Ես ապրում եմ Տավուշի մարզում, (Երևանից բավականին հեռու է) և սահմանամերձ գոտում գտնվելով՝ չէի պատկերացնում, որ նման հնարավորություն կունենամ: Սպասարկման ոլորտում ես ինձ բացահայտել եմ նորովի: Իմ ունակությունները, մարդկանց հետ շփումը, նրանց հետ հաղորդակցվելը բացահայտում են ինձ համար: Ուզում եմ, որ այդ ամենն ինձ մոտ դրսևորվի ոչ թե միայն այս փուլում, այլ՝ միշտ», – ասում է Մարիամ Մելիքյանը:

Արդեն 8 տարի՝ 2015 թվականից, Վիվա-ՄՏՍ-ն իրականացնում է կրթական կարևոր ծրագիր՝ Հայաստանի տարբեր բուհերի ուսանողների համար: Այս տարվա ծրագրով մայրաքաղաքում և մարզերում երկամսյա դասընթացների է մասնակցում տարբեր բուհերի 22 ուսանող: «Viva University»-ն մեկնարկային հնարավորություն է ոչ միայն հմտությունների բացահայտման, մասնագիտացման, այլև աշխատաշուկայում «դիրքավորման» տեսանկյունից: Այս տարվա ծրագրով ուսանողները մասնագիտական փորձառություն են ձեռք բերելու 2՝ ՏՏ (տեղեկատվական տեխնոլոգիաների) և վաճառքի ու բաժանորդների սպասարկման ոլորտում:

Կրթական ծրագրի բազմազանությունը երկու հոսքերի պրակտիկանտներին թույլ կտա ուսումնասիրել և զարգացնել և´ նեղ մասնագիտական, և´ ընդհանուր գիտելիքները հեռահաղորդակցության ոլորտում: