Թուրքիայի դեմ միջոցներ կկիրառվեն ԱՄՆ-ի կողմից. The Wall Street Journal

Ամերիկյան հայտնի պարբերական The Wall Street Journal-ը հոդված է հրապարակել, որտեղ անդրադարձ է կատարել Թուրքիայի՝ Ռուսաստանին տրամադրած օգնությանը և դրա հետևանքով ԱՄՆ-ի կողմից Թուրքիայի դեմ նախապատրաստվելիք միջոցներին։

Ըստ պարբերականի՝ ուշադրության կենտրոնում է Beks Ship Management ընկերությունը, որը 2021 թվականից ի վեր գնել է 37 նավ, որոնցից շատերը հնացած նավթատարներ են՝ ծախսելով ավելի քան կես միլիարդ դոլար երկու տարվա ընթացքում և 10 անգամ ավելացնելով իր նավատորմի նշանակությունը:

Նշվում է, որ Beks-ի նման ընկերությունները կարևոր տարր են Ռուսաստանի՝ ամբողջ աշխարհում նավթ մատակարարելու և Ուկրաինայում նրա պատերազմը ֆինանսավորելու փորձերի մեջ: Այս տարվա փետրվարի դրությամբ Beks-ը ռուսական նավթի առևտրի մեջ չորրորդ ամենամեծ արտահանողն էր, համաձայն բեռնափոխադրումների տվյալների, որոնք վերլուծել են Global Witness հակակոռուպցիոն խումբը։

ԱՄՆ իշխանություններն էլ նախատեսում են քայլեր ձեռնարկել Թուրքիայի դեմ նրա գործողությունների պատճառով, որոնք ըստ Վաշինգտոնի՝  համարվում են օգնություն Մոսկվային միջազգային պատժամիջոցները շրջանցելու գործում։ Հրատարակության խոսքով՝ Վաշինգտոնն այս հարցով կապի մեջ է Անկարայի հետ և նրան տեղեկացնում Մոսկվային աջակցություն ցուցաբերելու հետևանքների մասին։

Նշենք, որ անցյալ տարի Վաշինգտոնը սպառնացել էր թուրքական ընկերություններին պատժել սահմանափակումները շրջանցելու համար, ինչպես նաև նշել էր, որ իրավիճակը վնասում է երկկողմ հարաբերություններին։ Դրանից հետո թուրքական իշխանությունները խոստացել էին թույլ չտալ հանրապետության որևէ անձի կամ հաստատության շրջանցել պատժամիջոցները, սակայն հետագայում Անկարայի ներկայացուցիչները հայտարարություններ էին արել՝ հրաժարվելով միանալ սահմանափակումներին։ «Մենք կապ չունենք Արևմուտքի պատժամիջոցների հետ. Մենք ուժեղ պետություն ենք և դրական հարաբերություններ ունենք Ռուսաստանի հետ»,- ասել էր Թուրքիայի նախագահ Ռեջեփ Թայիփ Էրդողանը։