Telegram-ում և WhatsApp-ում աճել է կիբեռհանցագործությունը

F.A.C.C.T.-ի (ֆիշինգից պաշտպանության ընկերություն) մասնագետները հայտնաբերել են մոտ երկու հազար ֆիշինգային կայք, որոնք նախատեսված են Telegram-ում և WhatsApp-ում հաշիվներ գողանալու համար. նրանք նկատել են, որ կիբեռհանցագործների ամենաակտիվ շրջանն ամառն է, ասված է ընկերության հաղորդագրության մեջ, որը մեջբերում է ՌԻԱ Նովոստին:

«Ընթացիկ տարվա յոթ ամիսների ընթացքում հայտնաբերվել է 1893 ֆիշինգային ռեսուրս, որոնք ուղղված են Telegram-ի օգտատերերի հաշիվների գողությանը։ Նման էջերի առաջացման ամենաակտիվ ամիսներն են հունիսն ու հուլիսը, երբ հայտնաբերվել է համապատասխանաբար 369 և 589 խաբեությունների կայք։ 2023 թվականի գարնանը վերլուծաբանները սկսեցին բացահայտել հաշիվների առևանգման ֆիշինգային ռեսուրսները արդեն մեկ այլ հայտնի մեսենջերում՝ WhatsApp-ում։ Ապրիլից հուլիս ընկած ժամանակահատվածում հայտնաբերվել է 171 ֆիշինգային էջ, իսկ չարագործների ակտիվության գագաթնակետը գրանցվել է մայիսին (68) և հուլիսին (74)»,-փոխանցում են վերլուծաբանները։

Նման կայքերի համար ամենատարածված թեմաներից մեկը երեխաների ստեղծագործական մրցույթներն են: Խարդախություն անողները խնդրում են քվեարկել երաժշտական կամ պարային մրցույթում երեխայի հաղթանակի օգտին, որպեսզի նա կարողանա ամառային ճամբարի ուղեգիր ստանալ։ Նրանք ալիքներ են ստեղծում՝ ֆիշինգային կայքերի հղումներով, և օգտատերերին ավելացնում են այդ ալիքներում։ WhatsApp-ում հաշիվներ գողանալու համար ֆիշինգային էջերի հիմնական թեման դարձել է մանկական դասական բալետը. օգտատերերին խնդրում են քվեարկել մրցույթի մասնակից աղջիկների օգտին:

«Հաշիվները գողանալու համար կիբեռհանցագործները չեն սահմանափակվում մանկական ստեղծագործության թեմայով․ 2022 թվականի նոյեմբերից F.A.С.С.T.-ի փորձագետներն ամեն օր հայտնաբերում և արգելափակում են ֆիշինգային ռեսուրսները, որոնք Telegram-ի միջոցով թույլտվություն են պահանջում տարբեր կայքերում գրանցվելու համար, խաղերի բոնուսներ ստանալու, մրցանակների, սոցիալական ցանցերում լայքերի, անձնական լուսանկարների և մեսենջերում պրեմիում հաշիվների համար խմբերում»,- հայտնել են ընկերությունում:

Խաբեբաները հետաքրքրվում են ոչ միայն ռուսաստանցի օգտատերերով. նմանատիպ ֆիշինգային մեթոդները տարածվել են Իտալիայի, Հայաստանի, Ադրբեջանի, Ուզբեկստանի և Մալայզիայի լսարանների վրա։

«Ֆիշինգային էջերի քանակի ամառային աճը կարող է կապված լինել, ի թիվս այլ բաների, խարդախության խմբավորումների գործընկերային ծրագրերի ընդլայնման և ֆիշինգի ավտոմատացման հետագա զարգացման հետ։ Telegram-ալիքների տերերի և ադմինիստրատորների համար օգտահաշվի գողության լրացուցիչ վտանգ կա՝ «ջարդած» ռեսուրսներում խաբեբաները հաճախ գրառումներ են հրապարակում շահավետ ներդրումների մասին՝ հետևորդներից գումար շորթելով»,- մեկնաբանել է ֆիշինգից պաշտպանության F.A.C.C.T. ընկերության ղեկավար Իվան Լեբեդևը։

Փորձագետներն օգտատերերին խորհուրդ են տալիս մեսենջերներում միացնել երկփուլ անվտանգության համակարգը, ստուգել կասկածելի կայքերի դոմենային անունները, ոչ ոքի չհայտնել և կողմնակի ռեսուրսներում չմուտքագրել SMS-ով և push-հաղորդագրություններով ստացված կոդերը, քարտի տվյալները (PIN և CVV ծածկագրեր), անձնական տվյալները, չանցնել անհայտ անձանց կողմից ուղարկված կասկածելի հղումներով: