Բելառուսն ունի անձնագրերի տրամադրման նոր հրամանագիր
Նմանատիպ
Բելառուսի դիվանագիտական ներկայացուցչություններն այլևս նոր անձնագրեր չեն տրամադրի արտերկրում գտնվող բելառուսներին։ Բելառուսի ղեկավար Ալեքսանդր Լուկաշենկոյի կողմից սեպտեմբերի 4-ին ստորագրված և նրա կայքում հրապարակված «Փաստաթղթերի տրամադրման և գործողություններ կատարելու կարգի մասին» հրամանագիրը այժմ պահանջում է դիմել վերջին գրանցման վայրի ներքին գործերի նախարարությանը։
Նույնը վերաբերում է անձնագրերի փոխանակմանը և նորացմանը. նոր հրամանագիրը բացառում է դիվանագիտական ներկայացուցչության իրավունքը՝ երկարաձգելու արտերկրում գտնվողների անձնագրերի վավերականությունը։ Արտերկրում բնակվող Բելառուսի քաղաքացին կկարողանա անձնագիր ստանալ միայն արտաքին գործերի նախարարության կամ Բելառուսի Հանրապետության ներքին գործերի նախարարության միջոցով: Նախկինում դա կարող էին անել դիվանագիտական ներկայացուցչությունները կամ հյուպատոսական հիմնարկները:
Բացի այդ, ըստ հրամանագրի, գույքի հետ կապված գործարքները նույնպես հնարավոր կլինեն միայն անձամբ կամ Բելառուսում ստորագրված լիազորագրի հիման վրա։
Մեկնաբանելով այս հրամանագիրը՝ բելառուսական ընդդիմության առաջնորդ, նախագահի նախկին թեկնածու Սվետլանա Տիխանովսկայան ասել է, որ «չտրամադրելով բելառուսներին հյուպատոսական օգնություն՝ պետությունը դուրս է եկել կյանքի ևս մեկ ոլորտից, որտեղ պետք է հոգ տանի քաղաքացիների մասին»։
Նա խոստացել է խորհրդակցություններ անցկացնել Եվրահանձնաժողովի հետ, ինչպես նաև այդ հարցը բարձրացնել Եվրախորհրդարանի առջև և ՄԱԿ-ի Գլխավոր ասամբլեայի ժամանակ։ Տիխանովսկայան բելառուսներին կոչ է արել խուճապի չմատնվել և չմտածված գործողություններ չանել։
Բելառուսի նոր անձնագիրը ներկայացվել է օգոստոսի սկզբին Վարշավայում կայացած «Նոր Բելառուս» համաժողովում։ Փաստաթուղթը նախատեսված է բելառուսների համար, ովքեր չեն կարող վերադառնալ երկիր՝ փոխանակելու իրենց անձնագրերը։ Կառավարությունը բանակցություններ և խորհրդակցություններ է անցկացրել Եվրոպական հանձնաժողովի և մի շարք ազգային կառավարությունների հետ անձնագրերի ճանաչման հարցի շուրջ։
