Պետդեպարտամենտը և Պենտագոնը կողմ են Կիև ATACMS հրթիռներ ուղարկելուն
Նմանատիպ
Պետդեպարտամենտը և Պենտագոնը խորհուրդ են տալիս նախագահ Ջո Բայդենին սկսել Կիևի իշխանություններին հեռահար ATACMS հրթիռների մատակարարումը։ Այս մասին հաղորդում է CNN-ը՝ հղում անելով աղբյուրներին։
Ըստ տեղեկությունների՝ նշված գերատեսչությունները կարծում են, որ «հրթիռներ ուղարկելը կարող է օգնել Ուկրաինային առաջ մղել իր հակահարձակումը, որը չափազանց դանդաղ է շարժվում՝ համոզիչ առաջընթացի հասնելու համար»։ «Դրա հավանականությունը (Կիևին ATACMS հրթիռներ մատակարարելը) այժմ զգալիորեն աճել է», – հեռուստաընկերությունը մեջբերում է բանակցությունների ընթացքին ծանոթ ամերիկացի պաշտոնյաներից մեկի խոսքերը։ Սակայն հրթիռների տեղափոխման վերաբերյալ վերջնական որոշում դեռ չի կայացվել։
Ավելի վաղ Politico թերթը հայտնել էր, որ Կիևի իշխանությունները հույս ունեն, որ ԱՄՆ-ը կհայտարարի Ուկրաինայի զինված ուժերին հեռահար ATACMS հրթիռների մատակարարման մասին մինչև սեպտեմբերի 19-ին ՄԱԿ-ի Գլխավոր ասամբլեայի բացման բարձր մակարդակի շաբաթը։ Միաժամանակ ամերիկյան վարչակազմը պնդում է, որ այդ ժամկետը չափազանց կարճ է նման որոշում կայացնելու համար։
Մինչև 300 կմ հեռահարություն ունեցող ATACMS հրթիռները կարող են արձակվել HIMARS բազմակի արձակման հրթիռային համակարգի միջոցով։ Կիևը բազմիցս դիմել է Վաշինգտոնին՝ ATACMS հրթիռներ տրամադրելու խնդրանքով:
Ավելի վաղ Reuters-ը հայտնել էր, որ ԱՄՆ-ը մոտ է Ուկրաինային կասետային մարտագլխիկներով ATACMS կամ GMLRS հեռահար հրթիռների մատակարարման հաստատմանը։ ABC հեռուստաընկերության տվյալներով՝ ԱՄՆ-ը կարող է ATACMS-ը ներառել Կիևին տրամադրվող ռազմական օգնության հաջորդ փաթեթում։ Սակայն, ինչպես երկուշաբթի լրագրողների հետ ճեպազրույցում ասաց Պետդեպարտամենտի մամուլի ծառայության ղեկավար Մեթյու Միլլերը, Վաշինգտոնը չի փոխել իր դիրքորոշումը Ուկրաինային ATACMS-ների հնարավոր մատակարարումների վերաբերյալ և չի տեղափոխում դրանք Կիև։
