Իսրայելը հայտարարել է Լիբանանի սահմանամերձ շրջաններին հարվածելու մասին

Իսրայելական զորքերը հրետանիով և ուղղորդվող ականանետային զինամթերքով հարվածներ են հասցրել Լիբանանի սահմանամերձ շրջաններին՝ ի պատասխան շիա իսլամիստական «Հեզբոլլահ» կուսակցության զինված թևի հարձակումների։ Այս մասին հաղորդել է Իսրայելի պաշտպանության բանակը (ԻՊԲ)։

Ըստ ԻՊԲ-ի հայտարարության՝ թիրախների շարքում են եղել «ահաբեկչական օբյեկտներ և ենթակառուցվածք, դիտակետեր և տեխնոլոգիական սարքավորումներ, որոնք օգտագործվում են Իսրայելի դեմ ահաբեկչության համար»։

ԻՊԲ-ն հավելել է, որ «Հեզբոլլահ»-ը նաև հակատանկային հրթիռներ է արձակել Իսրայելի հյուսիսում գտնվող Ադամիտ կիբուցի ուղղությամբ․ տուժածներ չկան։ ԻՊԲ-ն հրետանիով հարվածել է արձակման վայրին։

Իր հերթին Al Jadeed հեռուստաալիքը հաղորդել է, որ Լիբանանում գնդակոծության է ենթարկվել 10 ավան։ Իսրայելական մի քանի արկեր պայթել են Լիբանանի բանակի հրամանատարական դիտարկման կետի մոտ։ Հեռուստաալիքի տվյալներով՝ զինծառայողներից ոչ ոք չի տուժել։

«Հեզբոլլահ»-ի զինյալները նոյեմբերի 9-ին գնդակոծել են Իսրայելի հյուսիսային շրջանները։ Ինչպես հաղորդում է Al Jadeed հեռուստաալիքը, կրակի տակ են հայտնվել իսրայելական զորքերի պահակակետերը հրեական երեք բնակավայրերում։ Շիաները պնդում են, որ կարողացել են խոցել երկու Merkava տանկ։ Իսրայելական հրամանատարության կողմից նման տվյալների հաստատում չի եղել: