Հակասեմականության համար մեղադրվող Մասկը կմեկնի Իսրայել

Իսրայելի նախագահ Իցհակ Հերցոգը երկուշաբթի կհանդիպի աշխարհի ամենահարուստ մարդու, ձեռներեց Իլոն Մասկի հետ, հայտնում է CNN-ը՝ հիշեցնելով, որ  Tesla և SpaceX ընկերությունների գործադիր տնօրենին մեղադրում են հակասեմականությանն աջակցելու համար:

Երկուշաբթի կեսօրին Մասկը պետք է հանդիպի Հերցոգի հետ փակ դռների հետևում: Հանդիպման ժամանակ Իսրայելի նախագահը կընդգծի առցանց տիրույթում աճող հակասեմականության դեմ պայքարելու անհրաժեշտությունը, հայտնում է նախագահի գրասենյակը:

Իսրայելի նախագահի գրասենյակի հայտարարության մեջ նաև ասվում է, որ  ՀԱՄԱՍ-ի կողմից պատանդ պահվողների ընտանիքների ներկայացուցիչները նույնպես կմիանան հանդիպմանը և Մասկին կպատմեն «հոկտեմբերի 7-ին ՀԱՄԱՍ-ի իրականացրած ահաբեկչության սարսափները»։

Հիշեցնենք, որ վերջերս  Մասկը մեկնաբանել էր X-ի օգտատերերից մեկի հրապարակումը, որում գրված էր, որ «հրեական համայնքները սպիտակամորթների նկատմամբ նույն դիալեկտիկական ատելությունն են քարոզում, ինչ նրանք պահանջում են դադարեցնել իրենց հանդեպ»

«Դուք իսկապես ճշմարտությունն եք ասում»,- այս հրապարակմանն արված մեկնաբանությունում գրել էր գործարարը։ Դրանից հետո նրան մեղադրել էին հակասեմականության համար: