Ուկրաինական կողմից ահաբեկիչների համար պատրաստված է եղել «պատուհան»՝ սահմանը հատելու համար․ Պուտին

ՌԴ նախագահ Վլադիմիր Պուտինը հանդես է եկել ուղերձով, որում նշել է, որ Ռուսաստանը գիտի, թե ինչ է ահաբեկչության սպառնալիքը և ակնկալում է փոխգործակցություն բոլոր պետությունների հետ, որոնք կիսում են իրենց ցավը։

Իր ուղերձում Պուտինը ցավակցություն է հայտնել բոլոր նրանց, ովքեր կորցրել են հարազատներին ու ընկերներին։

«Մենք կբացահայտենք և կպատժենք բոլորին. Crocus-ում ահաբեկչության բոլոր մեղավորները, կազմակերպիչները և պատվիրատուները արդար պատիժ կստանան։

Բժիշկներն այժմ պայքարում են տուժածների կյանքի համար։ Նրանք անում են հնարավոր ամեն ինչ»,- ասել է ՌԴ նախագահը։

Ըստ Վլադիմիր Պուտինի՝ նախնական տվյալով ուկրաինական կողմից «Կրոկուս»-ի ահաբեկչության մասնակիցների համար պատրաստված է եղել «պատուհան»՝ սահմանը հատելու համար

ՌԴ նախագահի հրամանագրով, մարտի 24-ին երկրում համազգային սուգ է հայտարարել։

«Մարտի 24-ը հայտարարում եմ համազգային սգո օր»,- ասել է պետության ղեկավարը։

Հիշեցնենք, որ երեկ՝ մարտի 22-ին, անհայտ անձինք կրակ են բացել Մոսկվայի «Crocus City Hall»-ում, «Պիկնիկ» խմբի համերգից առաջ, ինչի արդյունքում նաև հրդեհ է բռնկվել։

Այս պահին զոհերի թիվը հասել է 121-ի, որոնցից 3-ը երեխա, սակայն այն կարող է դեռևս աճել։ Հիվանդանոցներում է գտնվում 115 մարդ, որոնցից 5-ը երեխա։

Ներկայումս հրդեհը մեկուսացված է։ Հրդեհի մեկուսացումից հետո զոհերից մեկի հագուստի վրա հայտնաբերել են ինքնաշեն պայթուցիկ սարքի նմանվող առարկա: Այն վնասազերծվել է։ Նախնական տվյալներով՝ մահացածը ահաբեկիչներից մեկն է։

«Կրոկուսի» 5 աշխատակից է ձերբակալվել, նրանց հարցաքննում են։ Հայտնի է, որ ահաբեկիչները միասին են տեղաշարժվել, ոչինչ չեն բղավել և պատանդ չեն վերցրել, նրանք անխնա գնդակահարել են մարդկանց։

ՌԴ հատուկ ծառայությունները հայտնում են, որ Հարձակվողների ուսապարկերում եղել են վառելիքով տարաներ, հարձակումից հետո նրանք լցրել են այն և այրել, ինչը ուժեղ հրդեհ է առաջացրել։

Նշենք նաև, որ Հատուկ ծառայությունների և իրավապահ մարմինների գործողությունների արդյունքում ձերբակալվել է 11 հոգի, այդ թվում՝ 4 ահաբեկիչներ, ովքեր անմիջական մասնակցություն են ունեցել «Կրոկուս Սիթի Հոլլում» տեղի ունեցած ահաբեկչակաան ակտին, նրանց հանցակիցներին հայտնաբերելու ուղղությամբ գործողությունները շարունակվում են, հայտնել է Ռուսաստանի Անվտանգության դաշնային ծառայությունը։

«Արդեն պարզվել է, որ ահաբեկչությունը մանրակրկիտ ծրագրված է եղել։ Ահաբեկիչների կողմից օգտագործված զենքերը նախապես պատրաստվել են գաղտնի պայմաններում։  Ահաբեկչությունն իրականացնելուց հետո հանցագործները պլանավորել են հատել ռուս-ուկրաինական սահմանը, համապատասխան կոնտակտներ են պահպանել ուկրաինական կողմի հետ»,- հայտարարել են ՌԴ ԱԴԾ-ում։