Քանի՞ տարեկան է ամենաերիտասարդ միլիարդատերը․ Forbes

Forbes ամսագիրը թարմացրել է 2024-ի ամենահարուստ երիտասարդների ցանկը։ Աշխարհի ամենաերիտասարդ 25 միլիարդատերերի տարիքի բարձր շեմն այս տարի հասնում է 33-ի, ամենացածր շեմը 19-ն է:

Նրանց համատեղ կարողությունը գնահատվում է 110 միլիարդ դոլար։ Նրանցից ոմանք ինքնուրույն են հաջողության հասել և ստեղծել այնպիսի հայտնի ընկերություններ, ինչպիսիք են Snap-ը (Էվան Շպիգել, 33), Gymshark-ը (Բեն Ֆրենսիս, 31) և Oculus VR-ը (Փալմեր Լաքեյ, 31):

Աշխարհի ամենաերիտասարդ միլիարդատերը բրազիլուհի Լիվիա Վոյթն է։ Նա ընդամենը 19 տարեկան է և դեռ քոլեջում է սովորում։ Աղջկա կարողությունը գնահատվում է 1,1 միլիարդ դոլար՝ շնորհիվ WEG-ի, որն էլեկտրական սարքավորումներ արտադրող ընկերություն է։ Վերջինիս համահիմնադիրը աղջկա հանգուցյալ պապն է եղել: Լիվիա Վոյթն ու իր ավագ քույրը՝ 26-ամյա Դորա Վոյթ դե Ասիսը, 25 ամենաերիտասարդ միլիարդատերերի ցուցակում ներգրավված յոթ նոր դեմքերից երկուսն են, ինչպես նաև կարողությունը ժառանգություն ստացած 18-ից երկուսը:

Ժառանգություն ստացած ամենահարուստ երիտասարդները 25 և 27 տարեկան իռլանդացի Միսթրի եղբայրներն են։ Նրանցից յուրաքանչյուրի կարողությունը գնահատվում է 4,9 միլիարդ դոլար՝ շնորհիվ Մումբայում տեղակայված Tata Sons կոնգլոմերատի, որն ընդգրկում է տեղեկատվական տեխնոլոգիաների, հաղորդակցության, ճարտարագիտության և էներգետիկայի ոլորտները: Եղբայրները կարողությունը ժառանգել են հորից։