Լիբանանում բազմահազարանոց երթով ոգեկոչել են Ցեղասպանության 100-րդ տարելիցը
Նմանատիպ
Լիբանանում ապրիլի 24-ին Հայոց Ցեղասպանության 100-ամյա տարելիցի առիթով բազմահազարանոց երթ է տեղի ունեցել՝ Անթիլիասի մայրավանքից դեպի Բուրջ Համուդ թաղամասի մարզադաշտ: «Արմենպրես»-ի փոխանցմամբ՝ այս մասին տեղեկացնում են լիբանանյան լրատվամիջոցները:
Լիբանանյան «Ազդակ» օրաթերթը տեղեկացնում է, որ 100-ամյա տարելիցի առիթով «Քասլիքի Ս. Հոգի» և «Սեն Ժոզեֆ» համալսարաններն, ի աջակցություն լիբանանահայության, փակ են: Ավելի վաղ Լիբանանի կրթության նախարար Էլիաս Աբու Սաաբին որոշում էր ընդունել, որ պետական ու մասնավոր բոլոր վարժարանները ապրիլի 24-ին փակ կլինեն:
Լիբանանի խորհրդարանի պատգամավոր Սամի Ջեմայելն խորհրդարանում խոսել է Հայոց Ցեղասպանության մասին: Համացանցում տարածվել է նրա խոսքի տեսանյութը, որտեղ պատգամավորն արաբերեն խոսքի ընթացքում հայերենով նշել է. «Այսօր հիշում ենք Հայոց ցեղասպանության մեկուկես միլիոն նահատակներին և պահանջում ենք արդարություն»:
«Ես այս բառերով ուզում եմ հաստատել, որ մենք ճանաչում ենք Հայոց Ցեղասպանությունը և արդարություն ենք պահանջում աշխարհի ողջ հայության համար»,- եզրափակել է պատգամավոր Սամի Ջամայելը:
Հետևեք մեզ նաև Telegram-ում