Հարկային և մաքսային պատասխանատվության մեխանիզմները պետք է վերանայվեն
Նմանատիպ
Այսօր կառավարությունը քննարկել է ՀՀ Ազգային ժողովի պատգամավոր Միքայել Մելքումյանի՝ օրենսդրական նախաձեռնության կարգով ներկայացրած «Հարկերի մաuին» ՀՀ օրենքում փոփոխություն կատարելու մասին» օրենքի նախագծի եզրակացությունը:
Առաջարկվող փոփոխությունը վերավերում է հարկի վճարումը ուշացնելու դեպքում հաշվարկվող տույժի նվազեցմանը: Մասնավորապես՝ նախագծով առաջարկվում է սահմանել, որ հարկի վճարումը սահմանված ժամկետներից ուշացնելու դեպքում ժամկետանց յուրաքանչյուր օրվա համար օրենքով սահմանված տույժը հաշվարկվի ոչ թե ժամանակին չմուծված հարկի գումարի 0.15, այլ 0.075 տոկոսի չափով:
Հեղինակը իր առաջարկությունը հիմնավորել է նրանով, որ գործող դրույքաչափը էապես տարբերվում է ինչպես զարգացած երկրների, այնպես էլ ՀՀ-ի հետ տնտեսական սերտ ինտեգրման մեջ գտնվող ԵԱՏՄ անդամ պետությունների պրակտիկայից:
Պետք է նշենք, որ ԵԱՏՄ անդամ մյուս պետություններում օրենքով սահմանված ժամկետում չկատարված հարկային եւ այլ պարտավորությունների համար տույժի տարեկան դրույքաչափը որոշվում է ելնելով դրա հաշվարկման պահին գործող Կենտրոնական բանկի վերաֆինանսավորման դրույքաչափից կամ հաշվարկային դրույքից:
Ուշագրավ է, որ ԵՏՄ անդամ պետությունների, ինչպես նաև տարածաշրջանի այլ պետություններում գործող տույժերի հաշվարկման ընթացակարգերը Հայաստանի Հանրապետությունում սահմանված ընթացակարգերից տարբերվում են ոչ միայն նրանով, որ այդ պետություններում տույժերը հաշվարկվում են ավելի փոքր դրույքաչափերով, այլ նաև նրանով, որ այդ երկրներում տույժերի հաշվարկման առումով ժամկետային սահմանափակումներ սահմանված չեն: Ինչը նշանակում է, որ այդ պետություններում հարկի գումարը ժամանակին չվճարելու դեպքում տույժերը հաշվարկվում են ոչ թե առավելագույնը 365 օրվա համար, այլ անսահմանափակ օրերի համար՝ մինչև հարկի գումարի գծով առկա հարկային պարտավորության վերջնական մարումը:
Պետք է արձանագրենք, որ անկախությունից հետո անցած տարիների ընթացքում ՀՀ հարկային եւ մաքսային համակարգում, քաղաքականության մեջ տեղի են ունեցել էական բարեփոխումներ, ներմուծվել է նոր, ժամանակակից գործիքակազմ, կատարելագործվել են օրենսդրությունը եւ վարչարարությունը, այնուամենայնիվ, հարկային պատասխանատվության կիրառման դաշտում որոշ կարգավորումներ, ինչպիսին, օրինակ` ժամկետանց հարկային պարտավորությունների նկատմամբ կիրառվող տույժերն են, վերանայման կարիք ունեն և չեն համապատասխանում միջազգային հարկային վարչարարության հիմնարար սկզբունքներին:
Կառավարությունը կարևորելով խնդրի համակարգային լուծումը, գտել է , որ գործող հարկային օրենսդրությամբ սահմանված տույժերի հաշվարկման ընթացակարգերի վերանայման հարցն առավել նպատակահարմար է քննարկել հարկային օրենսգրքի նախագծով հարկային համակարգում առաջարկվող արմատական մի շարք փոփոխություններին զուգահեռ:
Հետևեք մեզ նաև Telegram-ում