Միջազգային հանրության ճնշումը Ադրբեջանի վրա բավարար չէ. Ալեքսանդր Սկակով
Նմանատիպ
Լավ է, որ ԵԱՀԿ Մինսկի խմբի եռանախագահները այցելում են տարածաշրջան, բայց պետք չէ այցի հետ մեծ հույսեր կապել: Այս մասին Tert.am-ի հետ զրույցում ասաց ՌԳԱ Արևելագիտության ինստիտուտի Կենտրոնական Ասիայի, Կովկասի ուսումնասիրման կենտրոնի աշխատանքային խմբի համակարգող, քաղաքագետ Ալեքսանդր Սկակովը:
«Ներկայումս հակամարտության խաղաղ կարգավորման գործընթացում առաջընթաց սպասել պետք չէ: Դա հնարավոր է միայն Վիեննայում ձեռք բերված պայմանավորվածություններն իրականացնելու շնորհիվ, երբ շփման գծում կտեղադրվեն տեսադիտարկող սարքեր, երբ կկատարվի մշտական մոնիթորինգ: Հակառակ դեպքում՝ տարածաշրջանային վերահսկողության տեսանկյունից առաջընթաց սպասել պետք չէ»,- ասաց Ալեքսանդր Սկակովը:
Ինչ վերաբերում է ՌԴ ԱԳ նախարար Սերգեյ Լավրովի հայտարարությանը, որ կողմերի միջև հակամարտության կարգավորման սկզբունքները համաձայնեցված են, բայց կան զգայուն ու միաժամանակ կարևոր հարցեր, Ա. Սկակովն ասաց, որ խոսքը հենց վերահսկողության մեխանիզմները տեղադրելու մասին է: Ըստ նրա՝ Լավրովն էլ ակնարկել է, որ հարկավոր է ճնշում գործադրել կողմերի վրա, որպեսզի նրանք կատարեն պայմանավորվածությունները:
«Հասկանալի է, որ Հայաստանն ու Ադրբեջանը պատրաստ չեն փոխզիջումների: Ավելին՝ Ադրբեջանը պատրաստ չէ իրականացնել այն, ինչին բանավոր պայմանավորվածությամբ համաձայնել է, խոսքս շփման գծում տեսադիտարկման սարքերը տեղադրելու, մշտադիտարկում անցկացնող խմբի ընդլայնման մասին է: Ադրբեջանը փորձում է կողմերի՝ միջազգային հանրության, Հայաստանի, Մինսկի խմբի ամրությունը ստուգել՝ խախտելով հրադադարը, արտահանձնել պահանջելով բելառուս բլոգեր Լապշինին, վերջերս էլ՝ Թբիլիսիի բլոգերին»,- մանրամասնեց Ալեքսանդր Սկակովը:
Քաղաքագետը միաժամանակ նշեց, որ միջազգային հանրության ճնշումը Ադրբեջանի վրա քիչ է, բավարար չէ: «Իսկ ճնշումը պետք է բոլոր կողմերն իրականացնեն՝ միաժամանակ, անընդհատ, պարբերաբար: Ռուսաստանը, Բրյուսելը, Վաշինգտոնը պետք է միաժամանակ գործողություններ իրականացնեն»,- ասաց նա՝ նշելով, որ Ռուսաստանը ճնշում բանեցնում է, բայց, հավանաբար, ոչ բավարար չափով:
Հետևեք մեզ նաև Telegram-ում