Ադրբեջանում ընդգծված հակահայկական քարոզչություն կա
Նմանատիպ
Ադրբեջանում ղարաբաղյան գործոնը երբեք հիմք չի հանդիսացել ընդդիմություն-իշխանություն համագործակցության համար: Ադրբեջանագետ Տաթեւիկ Հայրապետյանը կարծում է, որ դա խաղաքարտ է բանավեճերի համար:
Նա անդրադարձավ մարտի 31-ին Ադրբեջանում տեղի ունեցած հանրահավաքին, որին մասնակցում էին քաղաքական ուժերը: Գլխավոր ընդդիմադիրները բոյկոտել են ընտրություններն ու հայտարարել, որ նախատեսված ժամանակը բավարար չէ ընտրություններին պատրաստվելու եւ մասնակցելու համար:
«Ուշագրավ է այն, որ հանրահավաքներին, բացի սոցիալական խնդիրներն առաջ քաշելուց, կոռուպցիայի դեմ պայքարի կոչերից, հնչում էին կարծեցյալ հայկական ահաբեկչությունը դատապարտելու, Ղարաբաղը վերադարձնելու պահանջներ»,-լրագրողների հետ զրույցում ասաց ադրբեջանագետը:
Չնայած այս ամենին՝ Տաթեւիկ Հայրապետյանը նշեց, որ Ադրբեջանում ընդդիմությունը վերահսկվում է, եւ միգուցե հենց իշխանությունն էր ցանկանում, որ հնչի հակահայկական քարոզչություն:
«Ադրբեջանական դիրքորոշումն ընտրություններից հետո ավելի կկոշտանա: Հռետորաբանությունն ինչ-որ առումով հանգեցնում է գործողությունների, այստեղ հռետորաբանական բլեֆի խնդիր կա, թե դու որքան հեռուն կարող ես գնալ քո հռետորաբանությամբ»,-ասաց նա եւ հավելեց, որ զգուշավորությունը հայկական կողմին չի խանգարի:
Բանախոսն ընդգծեց, որ ընդդիմության հակահայկական կոչերը պատահական չեն, քանի որ եթե խոսվեր երկրում առկա բռնատիրության, գործազրկության մասին, դա այլ հարց կլիներ, սակայն, նրա խոսքով, այնտեղ նկատվում է ընդգծված հակահայկական քարոզչություն:
Հետևեք մեզ նաև Telegram-ում