Արտաքին ծառայություն իրականացնող ստորաբաժանումներում չպետք է լինի կոռուպցիա
Նմանատիպ
ԵՐԵՎԱՆ , 12 ՄԱՅԻՍԻ, Times.am: Ոստիկանության պետ Վալերիյ Օսիպյանը մայիսի 12-ին խորհրդակցություն է անցկացրել ոստիկանության արտաքին ծառայության ղեկավար կազմի հետ։ Ինչպես տեղեկացրին ոստիկանության լրատվության և հասարակայնության հետ կապերի վարչությունից, ոստիկանության պետը շնորհակալություն է հայտնել անձնակազմին վերջին շրջանում իրականացրած ծառայության համար։
Խոսելով ծառայության խնդիրների մասին՝ Վալերիյ Օսիպյանը նշել է, որ արտաքին ծառայություն իրականացնող ստորաբաժանումներում չպետք է լինի կոռուպցիա։ Նման դրսևորումներ հայտնաբերելու դեպքում ոստիկանները խիստ կպատժվեն և կենթարկվեն պատասխանատվության։
Կարևորվել է արտաքին ծառայություն իրականացնող աշխատակիցների համազգեստի կոկիկությունն ու կարգապահությունը, քանի որ քաղաքացին առաջին հերթին հենց նրանց է տեսնում և պատկերացում կազմում համակարգի մասին։
Նշվել է, որ համայնքային ոստիկանության հենակետերը պետք է ավելի կանոնակարգեն աշխատանքը, իսկ համայնքային ոստիկանները հաճախ հանդիպումներ ունենան բնակիչների հետ, լսեն հուզող հարցերն ու հնարավորության դեպքում լուծումներ տան, կամ ուղղորդեն համապատասխան մարմիններ։ Համայնքային ոստիկանները պետք է լիարժեք տիրապետեն իրենց սպասարկող տարածքներում տիրող իրավիճակին։
Վալերիյ Օսիպյանը կարևորել է նաև այս տարի անցկացվելիք միջոցառումների՝ Հայաստանի Հանրապետության 100-ամյակի, Երևանի 2800-ամյակի և Ֆրանկոֆոնիայի գագաթնաժողովի պատշաճ անցկացումը։
Խորհրդակցությանը քննարկվել են արտաքին ծառայությանը վերաբերող այլ հարցեր ևս։