Կասկածներ կան, որ Մանվել Գրիգորյանը յուրացրել է բանակին և Ղարաբաղի ժողովրդին ուղարկված օգնությունը և դրանով կերակրել իր կենդանիներին. Վարչապետ

ԵՐԵՎԱՆ, 17 ՀՈՒՆԻՍԻ, Aysor.am։ ԱԺ պատգամավոր, գեներալ Մանվել Գրիգորյանի ձերբակալությունը կապված չէ միայն մեծ քանակությամբ զենք-զինամթերք պահելու հետ, այլ կապված է նաև այն կասկածների հետ, որ նա մասնակցություն ունի ապրիլյան պատերազմի համար հավաքված օգնությունները յուրացնելու և գողանալու հետ, այսօր Facebook-ի ուղիղ եթերում հայտարարեց վարչապետ Նիկոլ Փաշինյանը:

«Կասկածներ կան, որ նա, օրինակ, դպրոցականների կողմից զինվորների համար ուղարկված սնունդը յուրացրել է և դրանով կերակրել է իր կենդանիներին՝ իր արջերին, իր վագրերին և այդպես շարունակ: Հիմնավոր կասկածներ կան, որ նա յուրացրել է Ղարաբաղի ժողովրդին ուղարկված օգնությունները, բանակին ուղարկված օգնությունները: Այս կասկածները հիմնավորվում են նրա առանձնատանը կատարված խուզարկությունների արդյունքներով», – հայտարարեց Ն.Փաշինյանը:

Անդրադառնալով հայտարարություններին, որ Մանվել Գրիգորյանը Արցախի հերոս է, Փաշինյանն ասաց, որ այդ փաստը չի վիճարկում, չի ժխտում:

«Այո, Մանվել Գրիգորյանը Արցախի հերոս է, բայց նույնիսկ հերոսներին իրավուն տրված չի Գյումրիի, Էջմիածնի, Երևանի դպրոցականների կողմից ճակատում կռվող զինվորների համար նախատեսված օգնությունները գողանալ ու դրանով կերակրել սեփական կենդանիներին՝ արջերին, վագրերին, շներին», – նշեց Փաշինյանը՝ ընդգծելով, որ անձի անմեղության կանխավարկածը չի ցանկանում խախտել:

Բացի այդ, ըստ Փաշինյանի, կան կասկածներ, որ յուրացվել են նաև բանակի համար նախատեսված տեխնիկակակն միջոցներ, մասնավորապես, ավտոմեքենաներ։