Երևանում Վարդավառի տոնին նվիրված միջոցառումները կմեկնարկեն հուլիսի 7-ից

ԵՐԵՎԱՆ, 6 ՀՈՒԼԻՍԻ, Times.am: «Երևան 2800» հոբելյանական միջոցառումների ծրագրով հուլիսի 7-ին, ժամը 18:00-ին, Արարատյան Հայրապետական թեմի երիտասարդաց միությունները և Երևանի քաղաքապետարանը հրավիրում են մասնակցելու Վարդավառի նախատոնակի մեծ տոնախմբությանը:

Ինչպես տեղեկացրին Երևանի քաղքապետարանի տեղեկատվության և հասարակայնության հետ կապերի վարչությունից, տոնական երթը կմեկնարկի Առաջնորդանիստ Սուրբ Սարգիս եկեղեցուց մինչև Երևանի մանկական զբոսայգի, որտեղ տեղի կունենա տոնը խորհրդանշող ազգային երգ ու պարով միջոցառում:

«Իսկ, հուլիսի 8-ին՝ ժամը 12:00-ին սիրով հրավիրում ենք Կարապի լճի հարակից տարածք՝ մասնակիցը լինելու ավանդական դարձած «Վարդավառի տոնը Երևանում» գլխավոր միջոցառմանը, ուր բոլորին սպասվում են հետաքրքիր խաղեր, համերգային ծրագիր, ջրային դիսկոտեկ և բազմաթիվ անակնկալներ: Ծրագիրը իրականացվում է «Երևանյան ամառ 2018» եռամսյա միջոցառումների ծրագրով:

Միաժամանակ, մայրաքաղաքի բոլոր վարչական շրջաններում առավոտից կմեկնարկեն տարաբնույթ միջոցառումներ:

Հրավիրում ենք բոլորին մասնակցելու Վարդավառին նվիրված տոնական միջոցառումներին»,- ասված է քաղաքապետարանի տարածած հաղորդագրությունում: