Ոչ իշխանական չլինելու պատճառով չեն ընդունում
Նմանատիպ
«Աբսուրդ է, որ Սահմանադրական փոփոխություններում նշվում է խորհրդարանական կառավարման համակարգի անցման մասին, բայց խոսք չկա 100 տոկոսանոց համամասնական ընտրակարգի հետ կապված: Այս գաղափարը մեզ համար անընդունելի է: Այս դեպքում պետք էր ուրեմն ասել՝ եկեք պարզապես բարձրացնենք խորհրդարանի դերը: Մենք կողմ ենք օրենսդիրի լիազորությունների ավելացմանը»,– այսօր լրագրողների հետ հանդիպմանը հայտարարեց ԱԺ «Օրինաց երկիր» խմբակցության անդամ Հովհաննես Մարգարյանն՝ անդրադառնալով իշխանությունների նախաձեռնած Սահմանադրական բարեփոխումներին:
Այս համատեքստում պատգամավորը տեղեկացրեց, որ իրենց նախաձեռնությամբ Ընտրական օրենսգրքի փոփոխությունների և 100 տոկոսանոց համամասնական ընտրակարգի անցնելու հարցով խորհրդարանական 4 խմբակցությունների՝ ՀՅԴ, ԲՀԿ, «Ժառանգություն», ՕԵԿ ներկայացուցիչներից աշխատանքային խումբ է ստեղծվում:
««Բարգավաճ Հայաստան» խմբակցությունից մասնակցելու է Տիգրան Ուրիխանյանը, «Հայ Յեղափոխական Դաշնակցությունից»՝ Արծվիկ Մինասյանը, «Ժառանգությունը» ներկայացնելու է Թևան Պողոսյանը, «Օրինաց երկիր» խմբակցությունը՝ ես: Հենքը լինելու է 100 տոկոսանոց համամասնական ընտրակարգը, բայց պահանջելու ենք նաև, որ ընտրություններից հետո ցուցակները հրապարակվեն: Ժողովրդական լեզվով ասած՝ տղամարդավարի պայմանավորվածություններ են ձեռք բերել, որպեսզի այս աշխատանքային խումբը գործի, այն էլ ռոտացիոն կարգով»,-ընդգծեց ՕԵԿ-ական պատգամավորը՝ նշելով, որ ՀԱԿ-ը չի մասնակցելու աշխատանքային խմբին, քանի որ ընդհանուր օրենքի նախագիծ ունի նույն հարցերի վերաբերյալ»,– ընդգծեց Մարգարյանը:
Վերջինը տեղեկացրեց, որ իրենց նախաձեռնությանը միանալու ցանկություն արտախորհրդարանական ուժերից հայտնել են «Արդարություն» և «Ագրարային» կուսակցությունները:
Հարցին, թե խորհրդարանական ոչ իշխանական ուժերի եռյակի կամ այլ ուժերի հետ ՕԵԿ-ի համագործակցությունը հնարավո՞ր է, Հովհաննես Մարգարյանը նկատեց, որ դա չի բացառվի, եթե սկզբունքների համընկնում լինի:
Հակադարձմանը՝ ինչո՞ւ է ոչ իշխանական եռյակը կամ ՀԱԿ-ը ԲՀԿ-ին ընդունում, իսկ ՕԵԿ-ին՝ ոչ, Մարգարյանն արձագանքեց.«Որովհետև մենք ընդդիմություն ենք և ոչ թե ոչ իշխանական»:
Ի դեպ պատգամավորը վստահեցրեց, որ կոալիցիայից դուրս գալուց հետո կուսակցություն մարդկանց լուրջ ներհոսք կա, իսկ իշխանափոխության անհրաժեշտություն ՕԵԿ-ում էլ են տեսնում՝ արտահերթ, թե հերթական ընտրությունների միջոցով:
Հետևեք մեզ նաև Telegram-ում