Ռուսաստանի, Չինաստանի և Հյուսիսային Կորեայի ղեկավարները դավեր չեն նյութում ԱՄՆ-ի դեմ. Ուշակով

Ռուսաստանի նախագահի օգնական Յուրի Ուշակովը, մեկնաբանելով ԱՄՆ նախագահ Դոնալդ Թրամփի հայտարարությունը, թե Պեկինի զորահանդեսում «դավեր են նյութում» Վաշինգտոնի դեմ, հայտարարել է, որ ՌԴ նախագահ Վլադիմիր Պուտինը, ինչպես նաև ՉԺՀ-ի և ԿԺԴՀ-ի ղեկավարներ Սի Ծինփինը և Կիմ Չեն Ընը միտք էլ չեն ունեցել դավեր նյութել ԱՄՆ-ի դեմ:

«Ցանկանում եմ ասել, որ ոչ ոք դավադրություն չի կազմակերպել, ոչ ոք ոչինչ չի նյութել, ոչ մի դավադրություն: Դեռ ավելին, դա ոչ ոքի, այդ երեք ղեկավարներից ոչ մեկի մտքում նույնիսկ չի եղել», – ասել է Ուշակովը:

«Բացի այդ, կարող եմ ասել, որ բոլորը հասկանում են, թե ինչ դեր են խաղում Միացյալ Նահանգները, նախագահ Թրամփի ներկայիս վարչակազմը և անձամբ նախագահ Թրամփը մեր ժամանակների միջազգային իրադրությունում»,- հավելել է նա:

Ավելի վաղ Թրամփը, մեկնաբանելով Պեկինի զորահանդեսը, ՉԺՀ նախագահին խնդրել է ողջույններ փոխանցել Պուտինին և Կիմ Չեն Ընին։

«Խնդրում եմ, իմ ամենաջերմ մաղթանքները փոխանցեք Վլադիմիր Պուտինին և Կիմ Չեն Ընին, մինչ դուք դավեր եք նյութում Ամերիկայի Միացյալ Նահանգների դեմ», – գրել է նա Truth Social-ում:

 

Հետևեք մեզ նաև Telegram-ում