Ուզում են Հայաստանը դարձնել երկիր՝ առանց խորհրդանիշների ու պատմության. Դանիելյան

«Եռաբլուր» զինվորական պանթեոնում լրագրողների հետ զրույցում ԱԺ «Հայաստան» խմբակցության պատգամավոր Գառնիկ Դանիելյանն ասել է․ «Ներկայիս իշխանությունն ամեն կերպ փորձում է հաճոյանալ Ալիևին և Էրդողանին, որպեսզի շանս ստանա վերարտադրվելու, նրանց նպատակն է Էրդողանի և Ալիևի հոգին փառավորելը»։

Նրա խոսքով՝ այս իշխանություններն ամբողջ թափով ջանում են մոռացության մատնել մեր հերոս նահատակների փառավոր ուղին: «Ուղարկվող պսակները նույնիսկ չեն բարեհաճում պատշաճ կերպով ուղարկել, տաքսիով են ուղարկում, սա վերաբերմունք  չէ»,-ասել է նա՝ ընդգծելով, որ իշխանությունն անում է ամեն բան, որպեսզի ջնջի մեր պատմությունն ու ազգային ինքնությունը, արշավ է սկսում Հայ Առաքելական եկեղեցու դեմ:

Խաղաղության մասին հայտարարությունները պատգամավորը «հերթական մանիպուլյացիա» է որակել՝ հաշվի առնելով, որ Ադրբեջանը խոսում է Զանգեզուրի, Հայաստանում ադրբեջանցիների տեղակայման մասին։

Դանիելյանը զգուշացրել է՝ այս ընթացքը վտանգում է Հայաստանի գոյությունը. «Ներկայիս իշխանությունները ուզում են Հայաստանը դարձնել երկիր՝ առանց խորհրդանիշների, պատմության, ազգանվեր գաղափարախոսության»։

Նա ցավով է արձանագրել է, որ իշխանությունները «սկսել են նոր կետից՝ նոր պատերազմներ, նոր տարածքներ, այսքան արհավիրքներ բերելով խմբագրում են մեր պատմությունը: Պատգամավորը կոչ է արել սերունդներին դաստիարակել հերոսների օրինակով, որպեսզի անհրաժեշտության դեպքում կարողանան ոտքի կանգնել և պաշտպանել հայրենիքը։

 

Հետևեք մեզ նաև Telegram-ում