Երկրպագուական շարժումներ, որոնք փչացրել են ակումբների հեղինակությունները

Երկրպագուական շարժումներ, որոնք փչացրել են ակումբների հեղինակությունները

Երկրպագուներն իրենց թիմերի կողքին են և՛ ուրախության, և՛ տխրության պահերին, սակայն երբեմն նրանք անցնում են սահմաններն, ու դա ուղիղ անդրադարձ է ունենում ակումբի հեղինակության վրա: Ներկայացնում ենք երկրպագուական այնպիսի շարժումներ, արարքներ որոնք առավել հետևանքային են եղել:

«Զենիթ»

Այս ակումբի երկրպագուներն ամբողջ աշխարհին մի մանիֆեստ ցույց տվեցին, որտեղ ընդգրկված էին այն ֆուտբոլիստների անունները, որոնց ակումբը պետք է ձեռք բերի և նրանցը, ում երկրպագուները չեն ցանկանում տեսնել թիմի կազմում: Ավելի ուշ կազմակերպիչները հայտարարեցին, որ իրենց հրապարակումը մասամբ է ներկայացվել և ճիշտ չի ընկալվել, սակայն արդեն ուշ էր: Արդյունքում` Եվրոպայում առանց այն էլ ոչ բարի համբավ ունեցող «Զենիթի» երկրպագուներին սկսեցին ընկալել նաև որպես ռասիստներ:

«Բարսելոնա»

«Բարսելոնայի»` «Nois Boixos» երկրպագուական շարժման ներկայացուցիչները 10 տարի առաջ «Կամպ Նոու» մարզադաշտում խոզի գլուխ նետեցին խոտածածկին: Ժեստն ուղղված էր կատալոնական ակումբից «Ռեալ» տեղափոխված Ֆիգուին: Իսպանիայում «Ռեալի» և «Բարսելոնայի» միջև հանդիպումները միշտ են անցել լարված պայքարում, սակայն խոզի գլխից հետո հակամարտությունն այլ երանգ ստացավ:

«Սպարտակ»

«Սպարտակի» երկրպագուներից չես խլի ստեղծագործող միտքն ու սրամտությունը: Խաղերից առաջ նրանց պատրաստած բաներները ցնցում են անգամ Եվրոպային, սակայն երբեմն այդ բաներները քրեական պատասխանատվության առաջ կանգնելու առիթ են դառնում: Օրինակ` «Տարեդարձդ շնորհավոր, 120 պապիկ» բաները, որտեղ 0-ի փոխարեն ֆաշիզմի հայտնի նշանն էր պատկերված: Կարդալ իմացող ցանկացած մարդ, բաները տեսնելով կհասկանար, որ դա ուղղված էր Ադոլֆ Հիտլերին: Բաները ներկայացնելուց օրեր առաջ վերջինիս ծննդյան 120-ամյակն էր:

«Չելսի»

Անգլիական ֆուտբոլում վերջին տարիներին խաղաղություն է տիրում, սակայն երկրպագուների բանդաները 5 տարի առաջ Սքոթլենդ-յարդի գլխացավանքն էին: «Չելսիի» երկրպագուներն էլ այդ խմբի ամենաակտիվ անդամներից էին: «Չելսիի» երկրպագուական խմբավորումներից մեկը «Գլուխների որսորդներ» անունն ուներ: Խաղից առաջ և հետո խմբավորման անդամներից գոնե մի քանիսը ծեծկռտուքների կիզակետում էին հայտնվում:

«Մանչեսթեր Յունայթեդ»

Նույնը կարելի է նաև «Մանչեսթեր Յունայթեդի» երկրպագուների մասին ասել: Իրենց թիմին միշտ աջակցող այս երկրպագուներին «Daily Mail»-ը «Չելսիի» և «Լիդսի» երկրպագուների հետ դասել է Անգլիայի վատագույն երկրպագուների շարքում: Թեև «Մանչեսթեր Յունայթեդի» երկրպագուները հիմա համեմատաբար հանգիստ են, սակայն ոչ վաղ անցյալում նրանցից շատերն իրենց «Եվրոտուր» ֆիլմի հերոսների պես էին պահում:

«Լիդս»

2008-ին «Daily Mail»-ը «Լիդսի» երկրպագուներին համարեց վատագույնն ամբողջ Մեծ Բրիտանիայում: 70-ականներից սկսած` բացի այս ակումբից` որևէ այլ ակումբի անուն այդքան հաճախ չնշվեց քրեական գործերում: Երկրպագուների մասսայական դաշտ ներխուժելը, հակառակորդ թիմի երկրպագուների հետ անընդհատ բախումները, տրիբունաներում անպատշաճ պահվածքն անշուշտ ոչ դրական ազդեցություն էին ունենում ակումբի հեղինակություն վրա:

«Նապոլի»

Իտալական ակումբներն իրենց երկրպագուների հետ հաճախ են խնդիրներ ունենում: «Նապոլին» բացառություն չէ: 2010-ին թիմը պետք է ընդուներ «Լիվերպուլին», իսկ երկրպագուների բանակը ձեռքերը ծալած չէր նստել: «Նապոլիի» երկրպագուները հանդիպմանն ատրճանակներով էին գնացել: Բարեբախտաբար, հնարավոր եղավ ողբերգությունից խուսափել, քանի որ ոստիկանները նախապես տեղեկացել էին ծրագրած գործողությունների մասին: Արդյունքում երեք մարդ կալանավորվեց, եվրոպական մամուլում մեծ աղմուկ բարձրացրացավ, իսկ ակումբը խնդիրների մեջ հայտնվեց:

Զագրեբի «Դինամո»

«Դինամոյի» երկրպագուները ևս նվեր չեն: Ֆրանսիացի ոստիկանները մեծ դժվարությամբ կարողացան լռեցնել երկրպագուների ամենաակտիվ խմբերից մեկի` «Bad Blue Boys»-ի անդամներին, ովքեր «Պարի Սեն Ժերմենի» հետ խաղից մեկ օր առաջ հարձակվել էին փարիզյան ակումբի երկրպագուների վրա: Արդյունքում մի քանի վիրավոր, մի քանի ձերբակալված երկրպագու…Փարիզի քաղաքային իշխանությունը հայտարարեց, որ չի կարողանում վերահսկել երկրպագուներին ու խաղից առաջ հյուրերին արգելեց մտնել մարզադաշտ: Ֆրանսիացի ոստիկանները մարզադաշտ եկածների տոմսերից բացի նաև անձնագրերը ստուգեցին:

ԲԿՄԱ

Երկար ժամանակ չի անցել այն օրից, երբ ՈՒԵՖԱ-ն պատժեց ԲԿՄԱ-ին, ու ռուսական թիմը ստիպված Չեմպիոնների լիգայում 3 տնային խաղ առանց երկրպագուների և 2 արտագնա փակ խաղ կանցկացնի: Պատճառը կրկին սիրելի երկրպագուներն են: Միջադեպը տեղի ունեցավ 2014/15 մրցաշրջանի Չեմպիոնների լիգայի խմբային փուլի առաջին տուրի` «Ռոմայի» դեմ խաղում: Ամեն ինչ սկսվեց սեպտեմբերի 17-ին, երբ «Ռոման» 5:1 հաշվով հաղթանակ տարավ: 71-րդ րոպեին հյուրերի երկրպագուներն սկսեցին անկարգություններ անել տրիբունաներում և կրակ նետել հաղթող ակումբի երկրպագուների ուղղությամբ:

«Գալաթասարայ»

2012-ի մայիսին «Ֆեներբախչեն» ընդունում էր «Գալաթասարային»: Երկու ակումբներն էլ ներկայացնում են Ստամբուլը, և ինչպես ընդունված է ասել` դաշտի տերեր ու հյուրեր չկան: «Գալաթասարայի» երկրպագուներից շատերին մարզադաշտ չթողեցին անվտանգության նկատառումներով: Խաղը վերջացավ 0:0 հաշվով, ինչը «Գալաթասարայի» համար չեմպիոնական նշանակություն ունեցավ: Հակառակորդ թիմի երկրպագուներ իրարանցում առաջացրին մարզադաշտում, բղավեցին` մրցավարին վիրավորելով: Վերջինս կարմիր քարտեր ցույց տվեց երկու թիմերի ֆուտբոլիստներն էլ: Ոստիկաններն արցունքաբեր գազի միջոցով երկրպագուներին դուրս բերեցին դաշտից, իսկ դրսում երկու ակումբների երկրպագուների բախումը շարունակվեց և ավարտվեց հիվանդանոցային ու ոստիկանական այցերով:

«Միլլուոլլ» և «Վեսթ Հեմ»

Այս հակամարտությունը Եվրոպայում ամենակոպիտներից է: Երկրպագուների առաջին բախումը 1906 թվականին էր, իսկ 1926 թվականը համարվում է այս ակումբների երկրպագուների միջև ատելության հիմքը: Մրցակիցները 80 տարվա ընթացքում 25 հանդիպում են ունեցել, սակայն ընդամենը 11 մրցաշրջան են նույն դիվիզիոնում անցկացրել: Ամենասկանդալային հանդիպումը 2009-ի օգոստոսի 25-ին էր: Լրացուցիչ ժամանակում «Վեսթ Հեմը» հաղթեց 3:1 հաշվով, իսկ խաղը 3 անգամ ընդհատվեց երկրպագուների պատճառով: Նրանք տրիբունաներից իջնում էին դաշտ: Ընդհարումների պատճառով 20 մարդ տուժեց:

«Լացիո»

Եվ վերջապես հերթը «Լացիոյի» երկրպագուներինն է: Այս ակումբի երկրպագուներին չի վախեցնում ո՛չ ոստիկանությունը, ո՛չ մամուլը և ո՛չ էլ տեղական իշխանությունը: Ակումբի նախագահ Կլաուդիո Լոտիտոն անգամ խոստովանել է, որ սեփական երկրպագուներից սպառնալիքներ է ստացել: «Լացիոյի» երկրպագուները միշտ մեծ բաներներ են պատրաստում և ակտիվ մասնակցում են խաղին, սակայն խոշոր միջադեպ դեռ չկա: «Լացիոյի» երկրպագուները հետ գլուխ դնել չես կարող, սակայն այս թիմի յուրաքանչյուր հանդիպում տաժանակիր աշխատանք է անվտանգության համակարգի աշխատակիցների համար:

Հետևեք մեզ նաև Telegram-ում