Ոչ իշխանական եռյակը դեկտեմբերի 10-ին հանրահավաք-երթ կանցկացնի, որը նվիրված կլինի Հայաստանում մարդու իրավունքների խնդիրներին: Այս մասին Ազգային ժողովում եռյակի հերթական հանդիպման ավարտից հետո լրագրողների հետ զրույցում տեղեկացրեց ՀԱԿ խմբակցության ղեկավար Լևոն Զուրաբյանը: «Եռյակի գլխավորությամբ, համաժողովր դական շարժումը դեկտեմբերի 10-ին` ժամը 13:00-ին, Հայաստանի բոլոր քաղաքացիներին հրավիրում է Ազատության հրապարակ, որտեղ կներկայացվի մարդու իրավունքների վիճակը Հայաստանում: Այդ օրը հզորագույն երթ ենք անցկացնելու Երևանում»,- «Արմենպրես»-ի հաղորդմամբ՝ նշեց Զուրաբյանը:
ՀԱԿ-ը 2011թվականից յուրաքանչյուր տարի դեկտեմբերի 10-ին Հայաստանում մարդու իրավունքներին նվիրված երթ անցկացրել է:
Նա նշեց նաև, որ եռյակը պլանավորում է արտահերթ նիստ անցկացնել հարյուր տոկոս համամասնական ընտրակարգին անցնելու և ընտրողների ցուցակները հրապարակելու վերաբերյալ: «Խորհրդակցելու ենք խորհրդարանական խմբակցությունների, առաջին հերթին` Դաշնակցության հետ, որովհետև իրենք, ինչ-որ առումով, այդ կետի «սեփականատերն» են: Եթե իշխանությունները հայտարարում են 12 կետերի կատարման մասին, մենք ներկայացնում ենք այդ կետը»,- ասաց Զուրաբյանը` հավելելով, որ արտահերթ նիստի կոնկրետ օրը կհայտարարեն հաջորդ քառօրյայի ժամանակ:
