Էսմայիլ Քաանին սպառնացել է ԱՄՆ-ին՝ հիշատակելով Բաբ էլ-Մանդեբի և Հորմուզի նեղուցները
Կարդացեք նաև
Իրանի Իսլամական հեղափոխության պահապանների կորպուսի «Քուդս» ուժերի հրամանատար Էսմայիլ Քաանին հայտարարել է, որ տարածաշրջանի դիմադրության ուժերը կարող են լուրջ ազդեցություն ունենալ ռազմավարական կարևորության ծովային ուղիների վրա՝ մասնավորապես նշելով Բաբ էլ-Մանդեբի և Հորմուզի նեղուցները։
Քաանին պնդել է, որ ամերիկյան ռազմածովային ուժերը վերջին ռազմական լարվածության ընթացքում դժվարությունների են բախվել Կարմիր ծովում և խուսափել են որոշ գործողություններից՝ դիմադրության ուժերի ներկայության պատճառով։
Նրա խոսքով՝ Բաբ էլ-Մանդեբի նեղուցը գտնվում է «Հեզբոլլահի», Եմենի «Անսար Ալլահ» շարժման (հութիների) և տարածաշրջանային այլ դիմադրական խմբերի ազդեցության ներքո։ Նա ընդգծել է, որ ԱՄՆ-ն զգում է այդ ուժերի ներկայությունը և հաշվի է առնում այն իր ռազմական ծրագրերում։
Քաանին նաև նշել է, որ դիմադրության առանցքը շարունակում է ընդլայնել իր հնարավորությունները և պատրաստ է հակազդել ԱՄՆ-ի ու Իսրայելի գործողություններին տարբեր ռազմավարական ուղղություններում։
Անդրադառնալով Հորմուզի նեղուցին՝ իրանցի հրամանատարը հայտարարել է, որ դրա շուրջ նախկինում հնչեցված նախազգուշացումները գործնականում ցույց են տվել իրենց ազդեցությունը։ Նրա խոսքով՝ Իրանի և նրա դաշնակիցների գործողությունները մեծացրել են ԱՄՆ-ին դիմակայելու պատրաստակամությունը տարածաշրջանում և դրանից դուրս։
Եզրափակելով՝ Քաանին զգուշացրել է, որ եթե ԱՄՆ-ը շարունակի ճնշում գործադրել կամ հարվածներ հասցնել իրանամետ ուժերին, ապա պետք է հաշվի առնի ոչ միայն Հորմուզի և Բաբ էլ-Մանդեբի նեղուցները, այլև այլ ռազմավարական կետեր, որոնք կարող են օգտագործվել որպես ճնշման միջոց։
Հետևեք մեզ նաև Telegram-ում