Հորմուզի նեղուցում երկու նավթատար է խոցվել, ևս չորսը փոխել են ուղղությունը․ ԻՀՊԿ
Կարդացեք նաև
Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ իր ռազմածովային ուժերը հարվածներ են հասցրել երկու նավթատար նավերի, որոնք, ըստ իրանական կողմի, փորձել են անցնել Հորմուզի նեղուցով՝ անտեսելով նախազգուշացումները։
ԻՀՊԿ-ի տվյալներով՝ նավերը շարժվել են «անօրինական և ոչ անվտանգ երթուղով»՝ ամերիկյան ավիացիայի ուղեկցությամբ։ Իրանական կողմը պնդում է, որ երկու նավթատարներն էլ խոցվել և կանգնեցվել են։
Իրանի ռազմական կառույցը հայտնել է նաև, որ ևս չորս նավ, որոնք, ըստ ԻՀՊԿ-ի, խախտել են սահմանված պահանջները, նախազգուշացում ստանալուց հետո փոխել են ուղղությունը և լքել տարածքը։
ԻՀՊԿ-ն հայտարարել է, որ տարածաշրջանում ամերիկյան զինուժի ցանկացած միջամտություն կամ նավագնացության գործընթացին միջամտելու փորձ «անպատասխան չի մնա»։
Իրանական կողմը կրկին կոչ է արել նավագնացության և ապահովագրական ընկերություններին չհիմնվել ԱՄՆ Զինված ուժերի Կենտրոնական հրամանատարության (CENTCOM) հաղորդագրությունների վրա և առաջնորդվել Իրանի պաշտոնական նախազգուշացումներով։
Հետևեք մեզ նաև Telegram-ում