Սեուտան կպաշտպանենք այնպես, ինչպես Մադրիդը՝ միգրացիոն ճգնաժամի ֆոնին․ Պեդրո Սանչես
Կարդացեք նաև
Իսպանիայի վարչապետ Պեդրո Սանչեսը հայտարարել է, որ երկրի իշխանությունները նույն վճռականությամբ կպաշտպանեն Սեուտայի անվտանգությունն ու ինքնիշխանությունը, ինչպես Մադրիդինը։ Նրա հայտարարությունը հնչել է այն բանից հետո, երբ վերջին օրերին Սեուտայում սրվել է միգրացիոն իրավիճակը՝ Մարոկկոյից հազարավոր միգրանտների զանգվածային ներհոսքի պատճառով։
«Պետությունն այստեղ է։ Մենք կպաշտպանենք Սեուտայի անվտանգությունն ու համակեցությունն այնպես, ինչպես կպաշտպանեինք Մադրիդում՝ M30 մայրուղու վրա։ Աշխարհագրական առումով կարող են լինել կենտրոն և ծայրամաս, սակայն պետական ինստիտուտների, քաղաքականության և զարգացման տեսանկյունից ո՛չ ծայրամաս կա, ո՛չ կենտրոն», – հայտարարել է Սանչեսը Սեուտա կատարած այցի ընթացքում։
Վարչապետի հայտարարությունը հնչել է այն ֆոնին, երբ միջազգային մամուլը հաղորդում է, որ վերջին 24 ժամվա ընթացքում տասնյակ հազարավոր մարդիկ Մարոկկոյից փորձել են ծովով և ցամաքով մուտք գործել Սեուտա՝ առաջացնելով լուրջ մարդասիրական և անվտանգության ճգնաժամ։ Իսպանիան սահմանային վերահսկողությունն ուժեղացնելու համար լրացուցիչ ուժեր է տեղակայել տարածաշրջանում, իսկ Մադրիդն ու Ռաբաթը սկսել են համագործակցել անօրինական միգրանտների վերադարձի ուղղությամբ։
Սեուտան Իսպանիայի ինքնավար քաղաքներից է, որը գտնվում է Հյուսիսային Աֆրիկայում և սահմանակից է Մարոկկոյին։ Այն Եվրոպական միության ցամաքային սահման ունեցող երկու իսպանական անկլավներից մեկն է և տարիներ շարունակ մնում է միգրացիոն ճնշման ու Մադրիդ–Ռաբաթ հարաբերությունների ամենազգայուն հարցերից մեկը։
Հետևեք մեզ նաև Telegram-ում