Մարիամ Աբրահամյան․ Իշխանության ներկայացուցիչները բոյկոտել են տեղահանվածների խնդիրներին նվիրված քննարկումը
Կարդացեք նաև
Ազգային ժողովում ընդդիմադիր խմբակցության նախաձեռնությամբ կազմակերպված խորհրդարանական լսումները, որոնք նվիրված էին Արցախից բռնի տեղահանված մեր հայրենակիցների սոցիալ-քաղաքական խնդիրներին, ուղեկցվել են իշխող «Քաղաքացիական պայմանագիր» խմբակցության պատգամավորների և նախարարությունների ներկայացուցիչների դեմարշով։
Լսումներին ներկա իշխանական պաշտոնյաները լքել են դահլիճը այն բանից հետո, երբ ելույթ ունեցողներին ներկայացրել են իրենց պաշտոններով՝ Արցախի Հանրապետության Մարդու իրավունքների պաշտպան, պետնախարար, ԱԺ փոխնախագահ և այլն։ Իշխանության ներկայացուցիչները իրենց քայլը պատճառաբանել են նրանով, որ չեն ընդունում նման ձևակերպումները, քանի որ ճանաչում են «միայն մեկ պետություն» և չեն կարող մնալ դահլիճում։
Անդրադառնալով միջադեպին՝ Մարիամ Աբրահամյանն իր ֆեյսբուքյան էջում սուր քննադատության է ենթարկել իշխանավորների պահվածքը․
«Ազգային ժողովում ընդդիմադիր խմբակցություններից մեկը լսումներ էր կազմակերպել բռնի տեղահանվածների սոցիալ-քաղաքական խնդիրների վերաբերյալ, որին ներկա էին նաև ՔՊ խմբակցության պատգամավորներ և տարբեր նախարարությունների լիազոր ներկայացուցիչներ։
Սակայն միայն նրա համար, որ ելույթ ունեցողներին ներկայացրին իրենց պաշտոններով՝ Արցախի Հանրապետության ՄԻՊ, պետնախարար, ԱԺ փոխնախագահ և այլն, իշխանության ներկայացուցիչները, որոնք ըստ էության պետք է լսեին արցախահայության խնդիրներն ու հետևություններ անեին, ուղղակի լքեցին դահլիճը։
Թե բա՝ մենք չենք ընդունում նման ձևով ներկայացնելը, մենք միայն մեկ պետություն ենք ճանաչում և չենք կարող մնալ այստեղ:
Հա, դե իհարկե, դուք սովոր եք լսել միայն ձեր ձեռքը սեղմողներին ու ձեզ գոհունակություն հայտնողներին։
Ապրե՛ք, դե հիմա պարգևավճար կստանաք»,- գրել է Մարիամ Աբրահամյանը։
Հետևեք մեզ նաև Telegram-ում