Россия 24-ի աղմկահարույց ռեպորտաժն ու Երևանի արձագանքը. Ի՞նչ է կատարվում Firebird կենտրոնում
Կարդացեք նաև
Ռուսական պետական Россия 24 հեռուստաընկերության եթերում հեռարձակված ծավալուն ռեպորտաժը լուրջ արձագանք է գտել հայաստանյան և տարածաշրջանային քաղաքական-տեղեկատվական դաշտում։ Ռուսական հեռուստաալիքն անդրադարձել է Հայաստանում գործող Firebird տվյալների կենտրոնին (Data Center)՝ այն ներկայացնելով որպես Միացյալ Նահանգների հնարավոր հետախուզական ենթակառուցվածք։
Ռեպորտաժի հեղինակները հանդես են եկել պնդմամբ, որ տվյալների այս կենտրոնը կարող է օգտագործվել ամերիկյան հատուկ ծառայությունների կողմից՝ հետախուզական նպատակներով, որոնք ուղղված են տարածաշրջանային երկու առանցքային պետությունների՝ Ռուսաստանի Դաշնության և Իրանի Իսլամական Հանրապետության դեմ։ Հեռուստաընկերության եթերում թեմայի վերաբերյալ մասնագիտական մեկնաբանություն է տվել ռազմական փորձագետ Ալեքսեյ Լեոնկովը, ով նույնպես պնդել է, որ կենտրոնի տեխնիկական հնարավորությունները, հզորություններն ու տեղակայումը կարող են ունենալ հստակ հետախուզական նշանակություն։
Ռուսական պետական հեռուստաալիքով հնչած այս գնահատականներին և մեղադրանքներին արձագանքել է ՀՀ բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանը։ Գերատեսչության ղեկավարը ռուսական կողմի պնդումները որակել է չհիմնավորված, քաղաքականացված և անհիմն։
«Եթե ունեք որևէ փաստ, ներկայացրեք դրանք։ Մենք ուրախ կլինենք նստել, քննարկել և կարգավորել այս հարցը»,- հայտարարել է նախարար Թադևոսյանը՝ ընդգծելով, որ առանց կոնկրետ ապացույցների ու առարկայական տվյալների ներկայացման նման հայտարարությունները մնում են բացառապես ենթադրությունների մակարդակում։
Միևնույն ժամանակ, նախարարը հստակեցրել է նախագծի ֆինանսական կառուցվածքը՝ նշելով, որ Firebird տվյալների կենտրոնի ստեղծման և ֆինանսավորման գործընթացին մասնակցել է նաև հայկական ֆինանսական հաստատությունների կոնսորցիումը, ինչը, ըստ նրա, վկայում է նախագծի տնտեսական ու տեխնոլոգիական ուղղվածության մասին։
Հետևեք մեզ նաև Telegram-ում