«Ռեալը» վստահ հաղթանակ տոնեց «Սևիլյայի» նկատմամբ (տեսանյութ)

Իսպանիայի առաջնության 30-րդ տուրում Մադրիդի «Ռեալը» սեփական հարկի տակ վստահ հաղթանակ տոնեց «Սևիլյայի» նկատմամբ. Զինեդին Զիդանի սաները 4 անպատասխան գնդակ ուղարկեցին մրցակցի դարպասը:

Հանդիպման 6-րդ րոպեին Գարեթ Բեյլի փոխանցումից հետո դաշտի տերերին առաջ մղեց Կարիմ Բենզեման: Նախքան ընդմիջման գնալը հյուրերը հաշիվը հավասարեցնելու հիանալի հնարավորություն ունեին. 26-րդ րոպեին գլխավոր մրցավար Խավյեր Ֆերնանդեսն արձանագրեց, որ Ռաֆայել Վարանը սեփական տուգանային հրապարակում խախտել է կանոնները և դաշտի տերերի դարպասին նշանակեց 11-մետրանոց հարված, սակայն Կևին Գամեյրոն չկարողացավ գրավել Կեյլոր Նավասի պաշտպանած դարպասը:

Երկրորդ խաղակեսի մեկնարկում 11-մետրանոց հարված նշանակվեց արդեն հյուրերի դարպասին, սակայն այս անգամ էլ Կրիշտիանու Ռոնալդուն չկարողացավ դիպուկ հարվածել: Այդուհանդերձ, րոպեներ անց պորտուգալացուն հաջողվեց դառնալ գոլի հեղինակ. 64-րդ րոպեին Ռոնալդուն կրկնապատկեց մադրիդցիների առավելությունը: Հանդիպման մնացած ժամանակահատվածում մեկական գոլ խփեցին Գարեթ Բեյլը և փոխրինման դուրս եկած Խեսեն:

Այս հաղթանակից հետո «Ռեալն» ունի 66 միավոր և շարունակում է զբաղեցնել մրցաշարային աղյուսակի երրորդ հորիզոնականը՝ երկրորդ տեղում գտնվող «Ատլետիկոյին» զիջելով 1 միավորով, իսկ առաջատար «Բարսելոնային»՝ 10: «Սևիլյան» մնաց 48 միավորով՝ 5-րդ տեղում:

Իսպանիայի առաջնություն, 30-րդ տուր

«Ռեալ» – «Սևիլյա»՝ 4:0
Գոլերը՝ Բենզեմա 6′, Ռոնալդու 64′, Բեյլ 66′, Խեսե 86′ 
Չիրացրած 11-մետրանոցներ՝ Ռոնալդու 58′ – Գամեյրո 27′