«Համեստ ու սեփական պարտքը գիտակցող». մայր բուհի ուսանողներն Արցախում բացահայտել են մերօրյա հերոսներին

Մայր բուհի դասախոսական և ուսանողական կազմն Արցախ այցելությունների շարք է սկսել` նպատակ ունենալով ճանաչելու «Մարտական խաչ» շքանշանի ասպետներին, նրանց մասին պատմություններով ու ակնարկներով իրազեկելու հանրությանը կատարած սխրանքի մասին: «Ապրիլյան քառօրյա պատերազմի հերոսն երը պետք է լինեն բոլորի ուշադրության կենտրոնում, մարդիկ պետք է նրանց ճանաչեն դեմքերով և արժանին մատուցեն նրանց, իրենց կատարած սխրանքների և մեզ տրված խաղաղության համար». հենց սա էր հունիսի 3-5-ը ԵՊՀ ներկայացուցիչների Արցախ կատարած այցի գլխավոր պատճառը:

Այցի ընթացքում ուսանողները հանդիպեցին «Մարտական խաչ» 2-րդ աստիճանի շքանշանի ասպետների հետ, ովքեր արժանացել են այդ շքանշանին ցուցաբերած բացառիկ խիզախության և արիության համար:

«Մեր այցելության գլխավոր նպատակը մերօրյա հերոսների հետ ծանոթանալն էր, ինչպես նաև մենք փորձում ենք որոշ չափով ծանոթացնել նրանց հասարակության հետ: Ուսանողները հիմնականում ԵՊՀ ժուռնալիստիկայի, Արևելագիտության և Պատմության ֆակուլտետներից էին, նրանք հետագայում հոդվածներ են ներկայացնելու իրենց այցելության և տպավորությունների մասին: Այս անգամ այց ելության հիմնական շեշտադրությունը դրված էր «Մարտական խաչ» 2-րդ աստիճանի շքանշանի ասպետների հետ ծանոթանալու վրա, ի զարմանս մեզ նրանք անչափ համեստ էին, չէին սիրում խոսել իրենց սխրանքների մասին համարելով, որ իրենք ուղղակի կատարել են իրենց պարտքը: Դա իսկապես զարմացնում ու հիացմունք էր պատճառում մեզ և մենք ևս մի անգամ հասկացանք, որ հենց այդպիսին են լինում իրական հերոսները: Մի այցով հնարավոր չէր հանդիպել բոլորին, դրա համար մեր այցերը կրելու են շարունակական բնույթ: Ուսանողների համար այս այցը շատ կարևոր էր նրանք հնարավորություն ունեցան ծանոթանալու մերօրյա հերոսների հետ: Այս այցելությունները ցույց են տալիս, որ բանակ- հասարակություն կապը կտրված չէ»,-«Արմենպրես»-ի հաղորդմամբ` ասաց ԵՊՀ ուսանողական խորհրդի նախագահ Ռաֆֆի Քարամյանը:

Քարամյանի խոսքով` սա նրանց առաջին այցելությունը չէ Արցախ, նրանք ունեցել են բազմաթիվ այդպիսի այցելություններ և վստահաբար այցելությունները կրելու են շարունակական բնույթ: