Վարչապետն անհրաժեշտ է համարում բացառել ծառայողական ավտոմեքենաների հետ կապված գերատեսչական խնդիրները
![Վարչապետն անհրաժեշտ է համարում բացառել ծառայողական ավտոմեքենաների հետ կապված գերատեսչական խնդիրները](https://times.am/v3/wp-content/uploads/2016/06/a87c4d82c8b47497661eb5a37c1655cc.jpg)
Նմանատիպ
ՀՀ վարչապետ Հովիկ Աբրահամյանը անհրաժեշտ է համարում բացառել դեպքերը, երբ ՊՈԱԿ-ներին ամրացված ծառայողական ավտոմեքենաներն օգտագործում են նախարարություններն ու գերատեսչությունները: Կառավարությունն այսօր որոշում ընդունեց, որով Առողջապահական ծրագրերի իրականացման գրասենյակին ամրացված ավտոմեքենան հետ վերցվեց և ամրացվեց ՀՀ առողջապահության նախարարության աշխատակազմին:
«Արմենպրես»-ի հաղորդմամբ՝ անդրադառնալով հարցին՝ վարչապետը նշեց. «Սա այն բազմաթիվ դեպքերից է, երբ ՊՈԱԿ-ների վրա ձևակերպված մեքենաներն օգտագործել են գերատեսչությունները, նախարարությունները: Մենք պետք է բացառենք այդ դեպքերը և բոլորն օրինականացնենք»:
Գործադիրի մեկ այլ որոշմամբ Վնասվածքաբանության և օրթոպեդիայի գիտական կենտրոնի, Ակադեմիկոս Էմիլ Գաբրիելյանի անվան դեղերի և բժշկական տեխնոլոգիաների փորձագիտական կենտրոնի, Նարկոլոգիական հանրապետական կենտրոնի, ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի սեփականություն հանդիսացող չորս ավտոմեքենաները որպես նվիրատվություն տրամադրվեցին ՀՀ առողջապահության նախարարությանը՝ ընթացիկ աշխատանքների պատշաճ իրականացման համար:
Հետևեք մեզ նաև Telegram-ում