Էդ. Նալբանդյան. «Առաջընթացի բացակայության և ստատուս քվոյի պահպանման միակ պատասխանատուն Ադրբեջանն է»
Նմանատիպ
Հայաստանի Հանրապետության Արտաքին գործերի նախարար Էդվարդ Նալբանդյանը պատասխանել է News.am-ի այն դիտարկմանը, թե Ադրբեջանում ամենաբարձր մակարդակով շարունակում է հնչել, որ Հայաստանն է պատճառը, որ ղարաբաղյան հարցում պահպանվում է ստատուս քվոն, և որ Հայաստանն ու Ադրբեջանը չեն կարող մրցակից լինել, հետևաբար Հայաստանը պետք է միակողմանի զիջումների գնա։
«Առաջընթացի բացակայության և ստատուս քվոյի պահպանման միակ պատասխանատուն Ադրբեջանն է։ Դրա մասին հայտնի է միջազգային հանրությանը, տեղյակ են եռանախագահները։
Եթե Ադրբեջանը իրոք շահագրգիռ է ստատուս քվոյի փոփոխմամբ, ապա վաղուց պետք է իր համաձայնությունը տված լիներ, այլ ոչ թե մերժեր վերջին
տարիներին եռանախագահների կողմից ներկայացված առաջարկությունները։
Իհարկե, Հայաստանը և Ադրբեջանը չեն կարող մրցակիցներ լինել ժողովրդավարության, հանդուրժողականության, մարդու իրավունքների, տնտեսական ազատությունների, մամուլի, խոսքի և այլ հիմնարար ազատությունների առումներով։ Մեր պետությունների և հասարակությունների տրամաբանությունը և ուղղվածությունը հակադարձ համեմատական են։
Ադրբեջանը խորացնում է ավտորիտարիզմի հիմքերը, Հայաստանը՝ ժողովրդվարության։ Դա հստակ երևում է միջազգային համապատասխան կառույցների գնահատականներում և վարկանիշային աղյուսակներում։ Հայստանի և Արդբեջանի միջև հսկայական տարբերություն կա։
Ադրբեջանում կարծում են, որ փողով կարող են հեղինակություն ձեռք բերել, բարեկամներ առնել, արձաններ կանգնեցնել, ինչ-ինչ կասկածելի բանաձևեր անցկացնել և դա ներքին լսարանին ներկայացնել որպես ձեռքբերում, բարձր համբավի ապացույց։
Փողի, խավիարի կամ անգամ նավթի առկայությամբ չէ, որ գնահատվում է երկրի հեղինակությունը միջազգային ասպարեզում։ Վերջին տարիներին մենք ականատես
եղանք, թե ինչ պատահեց ոչ պակաս հարուստ և ինքնագոհ բռնատիրական ռեժիմների հետ», մասնավորապես ասել է ՀՀ արտգործնախարարը։