Տարոն Մարգարյանը 60 նոր հեծանիվ է նվիրել պատանի մարզիկներին
Նմանատիպ
Երևանի քաղաքապետ Տարոն Մարգարյանն այսօր այցելել է Երևանի հեծանվահրապարակ: Ինչպես տեղեկացնում են Երևանի քաղաքապետարանի տեղեկատվության և հասարակայնության հետ կապերի վարչությունից, նախորդ այցի ժամանակ քաղաքագլուխը, ծանոթանալով մարզաձևի զարգացման ու խթանման համար մասնագետների կողմից առաջադրվող առաջնահերթություններին, խոստացել էր մայրաքաղաքի զարգացման 2013 թվականի ծրագրում ներառել նաև հեծանվահրապարակը պրոֆեսիոնալ նոր հեծանիվներով համալրելու հարցը: Հեծանվահրապարակ կատարած այսօչվա շրջայցի շրջանակում, խոստման համաձայն, արդեն ձեռքբերված 60 նոր հեծանիվները քաղաքապետն անձամբ է հանձնել պատանի մարզիկներին:
Կարևորելով մարզադպրոցի դերը մայրաքաղաքի սպորտային կյանքի աշխուժացման հարցում, Տարոն Մարգարյանն ընդգծել է, որ քաղաքապետարանը շարունակելու է աջակցել մարզակառույցին:
«Համոզված եղեք, որ յուրաքանչյուր տարի քաղաքապետարանն աջակցելու է հեծանվահարապարակին նոր հեծանիվներ ձեռք բերելու հարցում: Մեր նպատակն է զարգացնել ինչպես հեծանվասպորտը, այնպես էլ այն ծառայեցնել, որպես տրանսպորտի միջոց: Մենք նաև փորձելու ենք մայրաքաղաքում ստեղծել հեծանվականգառներ ու հեծանվուղիներ, որպեսզի մայրաքաղաքում հարմարավետ պայմաններ ապահովվեն նաև մեր այն քաղաքացիների համար, ովքեր նախընտրում են քաղաքում շրջել հեծանիվներով: Այս մշակույթը ևս մենք պետք է զարգացնենք Երևանում»,- ընդգծել է քաղաքապետը:
Շնորհակալություն հայտնելով խնդրին արագ լուծում տալու համար, պատասխանատուները նշել են, որ 90-ական թվականներից սկսած հեծանվահրապարակը չէր համալրվել նոր գույքով, ինչը խնդիրներ էր առաջացնում ինչպես մեծ թվով մարզվողներ ընդունելու, այնպես էլ լիարժեք մրցումներ կազմակերպելու համար:
Երեխաների խնդրանով քաղաքապետ Տարոն Մարգարյանն անձամբ է փորձարկել նոր հեծանիվների հնարավորությունները:
Հետևեք մեզ նաև Telegram-ում