Ինչպես արդեն հայտնի է, երեկ Գյումրու կենտրոնում հնչած կրակոցներից հետո Շեկո մականվամբ՝ Արտյոմ Կարապետյանը մահացել էր հիվանդանոցում՝ վիրահատության ժամանակ, իսկ Հարություն Խաչատրյանը (Քավոր Հարութ) այսօր արդեն վերականդանացման բաժանմունքից տեղափոխվել է վնասվածքաբանական բաժանմունք: Նրան ենթարկել են վիրահատությունների՝ ինչպես ոսկրային, այնպես էլ դիմածնոտային, քանի որ վիրաբույժի խոսքերով՝ գնդակը, որը մտել էր Հարությունի բազկից, պտտվել է մարմնի մեջ, դուրս չի եկել, այն բարձրացել է ուսագոտով ծնոտ և վնասելով ատամնաշարը, լնդերը և ծնոտը՝ հանգրվանել է լեզվի արմատում: Այս մասին տեղեկացնում է galatv.am-ը:
«Նրան հիվանդանոց բերել են ծանր վիճակով: Առաջին բանը, որ նկատվում էր, շոկային կլինիկան էր: Հակաշոկային միջոցառումներ ձեռք առնելուց հետո, նա վիրահատության է ենթարկվել: Ախտորոշումից հետո պարզվեց՝ աջ բազկի միջանցիկ հրազենային գնդակային վիրավորում ունի, ընդ որում՝ արմնկային հոդի փափուկ հատվածներում բազմաբեկորային կոտրվածք է առաջացել: Ուսահոդից անցել էր բերանի խոռոչ, վնասել էր ծնոտը, լնդերը և ատամնաշարը և հանգրվանել էր լեզվի արմատում: Դրա համար կատարվեց նաև դիմածնոտային վիրահատություն»,-ԳԱԼԱ-ին փոխանցել է Գյումրու բժշկական կենտրոնի վիրաբույժ, վիրահատող բժիշկ Խաչատուր Կարապետյանը: Բժշկի խոսքերով՝ հիվադի վիճակը ներկայում կարելի է գնահատել միջին ծանության:
Նրա բուժումը շարունակվելու է վնասվածքային բաժանմունքում, երկարատեւ բուժում է պահանջվում: Ներկա դրությամբ նրա կյանքին վտանգ չի սպառում:
