Երիտասարդությունը բանակի կողքին է. ապրիլյան պատերազմի հերոսի եղբայրը անվադողերի նոր խմբաքանակ կուղարկի սահման

Հայ երիտասարդները մշտապես իրենց նախաձեռնություններով բանակի կողքին են. ապրիլյան պատերազմի գյումրեցի հերոս, տանկիստ Տիգրան Աբգարյանի եղբայր Ժորա Աբգարյանի նախաձեռնությամբ արդեն տեւական ժամանակ Արցախ է ուղարկում անվադողերի մեծ խմբաքանակ: Ժորա Աբգարյանը դեռեւս սեպտեմբերից հերոսի ընկերների աջակցությամբ տարբեր վայրերից հավաքում եւ պահեստավորում է անվադողեր, ապա այն ուղարկում սահման:

«Սկզբում գնում էինք գյուղեր, տարբեր տեղերից բերում էինք: Շատուշատ լավ մարդիկ եւս միացան մեզ: Մեծ աջակցություն է ցուցաբերում Արցախի նախագահի խորհրդական Տիգրան Աբրահամյանը»,-«Արմենպրես»-ի հետ զրույցում ասաց հերոսի եղբայրը՝ տեղեկացնելով, որ 2017թ. սեպտեմբերից սկսած «Ուրալ» մակնիշի շուրջ 36-37 բեռնատարով անվադող է հավաքվել, որից սահման է ուղարկել 14-ը:

Նա նշեց, որ խրամատների ու սահմանապահ դիրքերի այլ տարածքների ամրացման նպատակով մեկնարկած նախաձեռնությունը շարունակական է լինելու: «Այս շաբաթ կրկին անվադողեր ենք ուղարկելու Արցախ»,-նշեց նա:

Ժորա Աբգարյանի խոսքով՝ իր նպատակն է հնարավորինս օգտակար լինել բանակին, տեսնել զինվորներին ավելի ապահով պայմաններում: «Ինձ ասում էին՝ չի ստացվի, իսկ ես ասացի՝ կանեմ, կտեսնեք: Ինձ մեծ ուժ է տալիս եղբայրս. ես գիտեմ, որ իրավունք չունեմ դժգոհելու կամ բողոքելու, որովհետեւ եղբայրս այս հողի համար զոհեց ամենաթանկը: Եթե մենք ապրենք ոչ մի բան չանելով, նշանակում է չենք ապրում: Այն, ինչ նրանք են սկսել, պարտավոր ենք շարունակել: Բառերով պարզապես դժվարանում եմ նկարագրել, թե ինչքան մեծ է սրտիս ցանկությունը»,-նշեց նա: