Էդուարդ Շարմազանով. Բոլոր այն մարդիկ, ովքեր մասնակցություն ունեն եւ մեղավոր են, պիտի պատժվեն անկասկած

ՀՀԿ խոսնակ, Ազգային ժողովի փոխնախագահ Էդուարդ Շարմազանովն անդրադառնալով Գորիսյան դեպքերին’ Henaran.am-ի հետ զրույցում ցավակցել է ողբերգական միջադեպի պատճառով սպանված Ավետիք Բուդաղյանի ընտանիքին, հարազատներին եւ ընկերներին:

«Խնդիրը իրավական տիրույթում է, իրավապահները շատ օպերատիվ արձագանքեցին, կարծում եմ քննությունը կպարզի մեղավորներին եւ բոլորը կպատժվեն»,-ասել է նա:

Հիշեցնենք, որ հունիսի 2-ին Սյունիքի մարզպետ Սուրիկ Խաչատրյանի առանձնատան մոտ տեղի ունեցած փոխհրաձգության արդյունքում սպանվել է Ավետիք Բուդաղյանը, նրա եղբայրը’ գնդապետ Արտակ Բուդաղյանն ու մարզպետի թիկնապահներից մեկը հիվանդանոցում են: Ձերբակալվել է մարզպետի որդին եւ թիկնապահներից մեկը:

Հարցին թե, արդյո՞ք օրակարգում Սուրիկ Խաչատրյանի պաշտոնանկության հարց կա’ Շարմազանովն նշել է. «բոլոր այն մարդիկ, ովքեր մասնակցություն ունեն եւ մեղավոր են, պիտի պատժվեն անկասկած»:

Մեկ այլ աղբյուրի` Aysor.am-ի փոխանցմամբ ի պատասխան այն հարցին, թե արդյո՞ք ՀՀկ-ն  հինգշաբթի նախատեսված Գործադիր մարմնի նիստը կգումարի այսօր՝ հուլիսի 3-ին, Է. Շարմազանովը նշել է, որ այսօր ՀՀԿ ԳՄ նիստ նախատեսված չէ և այն սովորականի պես կկայանա հինգշաբթի օրը: