Նոր մասնաշենք՝ «Էրեբունի» արգելոց-թանգարանում

ԵՐԵՎԱՆ, 17 ԴԵԿՏԵՄԲԵՐԻ, Irates.am: Երևանի ավագանին հավանություն է տվել 2019-ի հոկտեմբերի 3-ին Երևանի քաղաքապետ Հայկ Մարությանի և «Ջոն և Սոս Բալյան հիմնադրամի» միջև կնքված համագործակցության պայմանագրին: Ներդրումային ծրագրով նախատեսվում է «Էրեբունի» պատմահնագիտական արգելոց-թանգարանի նոր մասնաշենքի կառուցում: Տեղեկացնում են Երևանի քաղաքապետարանի հասարակայնության և կապերի բաժնից, նշում նաև, որ ժամանակակից տեխնոլոգիաներով հագեցած մասնաշենքն իր ճարտարապետությամբ համահունչ կլինի տարածքին, բայց միաժամանակ՝ հագեցած նորարարական տեխնոլոգիաներով: Թանգարանի այս հատվածում կտեղակայվեն նոր ցուցասրահներ, որտեղ կլինեն անիմացիոն ցուցադրություններ, և այցելուները Երևանի պատմությանը կծանոթանան վիրտուալ շրջագայությամբ: Տարածքում կբացվեն նաև գիտական լաբորատորիաներ: Շինարարության համար կհայտարարվի նախագծերի մրցույթ: Ծրագրի ընդհանուր արժեքն ավելի քան 1.65 մլն դոլարին համարժեք դրամ է:

Մեր հրապարակումներից մեկում անդրադարձել էինք նոր մասնաշենք ունենալու հեռանկարին: «Էրեբունի» պատմահնագիտական արգելոց-թանգարանի տնօրեն Միքայել Բադալյանը նշել էր, որ հուշագրի համաձայն՝ «էրեբունի» ամրոցի հետևի հատվածը կընդարձակվի, կստեղծվեն ենթակառուցվածքներ՝ վիրտուալ անիմացիոն ցուցասրահներով, ինչը կնպաստի նաև զբոսաշրջիկների թվի աճին ու ամրոցի հանրահռչակմանը:

Լուսանկարը՝ Վիքիպեդիայից