Խաչատրյանի փառատոնի շրջանակում կայացավ Լիլիթ Գրիգորյանի մենահամերգը

ԵՐԵՎԱՆ, 18 ԴԵԿՏԵՄԲԵՐԻ, Irates.am: Կոմիտասի անվան կամերային երաժշտության տունը լցվել էր դաշնակահարուհի‚ միջազգային մրցույթների դափնեկիր Լիլիթ Գրիգորյանի երաժշտության ելևէջներով։ Խաչատրյանի 7-րդ միջազգային փառատոնի շրջանակում կայացած մենահամերգի ընթացքում դաշնակահարուհին կատարեց Արամ Խաչատրյանի‚ Ֆրեդերիկ Շոպենի‚ Սերգեյ Ռախմանինովի‚ Ֆեդերիկո Մամպոուի և այլ կոմպոզիտորների ստեղծագործություններից։

Խմբավար, մանկավարժ, հասարակական գործիչ Դավիթ Ղազարյանը‚ խոսելով դաշնակահարուհի Լիլիթ Գրիգորյանի կատարողական վարպետության մասին‚ նշեց. «Լիլիթ Գրիգորյանը տաղանդավոր մարդ է։ Ես նրան հիշում եմ դեռ 6-7 տարեկանից։ 10 տարեկանում «Նոր անուններ» փառատոնում նա ամենահայտնիներից մեկն էր։ Հետագայում ուսումը շարունակեց Կոմիտասի անվան կոնսերվատորիայում։ Փայլուն‚ պրոֆեսիոնալ դպրոց է անցել Լիլիթը։ Համեստ անձնավորություն է‚ իր գործին նվիրված երաժիշտ։ Եվ ամեն անգամ Երևան նրա ժամանումը մեզ բոլորիս ուրախություն է պարգևում։ Այսօրվա համերգը լավ իմաստով բավականին ծանր ծրագիր ուներ‚ որը նա կարողացավ փայլուն ներկայացնել ունկնդրին։ Ես տպավորված եմ նրա կատարումներով»։

Դաշնակահարուհի Լիլիթ Գրիգորյանը մշտապես ձգտում է նորի։ Հարուստ է նրա կատարողական‚ համերգային կենսագրությունը։ Շրջագայություններ է ունեցել ամբողջ աշխարհում‚ ելույթ է ունեցել այնպիսի համերգասրահներում‚ ինչպիսիք են Բեռլինի Konzerthaus-ը‚ Համբուրգի Էլբֆիլհարմոնիան‚ Ամստերդամի Concertgebouw-ն‚ և բազմաթիվ այլ հայտնի հարթակներում։ Նրա կատարումները հեռարձակվել են BBC Radio 3, NDR Kultur, Radio France, France 3, RAI 3 ալիքներով։ Դաշնակահարուհին հանդես է եկել հայտնի նվագախմբերի հետ‚ բազում հեղինակավոր փառատոների շրջանակներում։
Հիշեցնենք‚ որ Խաչատրյանի 7-րդ միջազգային փառատոնը կազմակերպել է Հայաստանի պետական սիմֆոնիկ նվագախումբը՝ ՀՀ կրթության‚ գիտության‚ մշակույթի և սպորտի նախարարության աջակցությամբ։