Մոսկվայում կտեղադրվի լեգենդար հետախույզներ Վարդանյաններին նվիրված սառցե քանդակ

ԵՐԵՎԱՆ, 26 ԴԵԿՏԵՄԲԵՐԻ, Panorama.am: Մոսկովյում Պոկլոննայա բլրի վրա կտեղադրվի սառցե քանդակ՝ նվիրված խորհրդային լեգենդար հետախույզներ Գևորգ և Գոհար Վարդանյաններին: Այս մասին գրում է Ռիա նովոստին՝ հղում անելով ՌԴ արտաքին հետախուզական ծառայության մամուլի ծառայությանը:

Քանդակում զույգը կներկայացվի իրենց առաջին ամուսնության պահին՝ 1946 թվականին և կտեղադրվի թանգարանային համալիրի «Պատմություն» բաժնում՝ նվիրված խորհրդային ժամանակաշրջանին:

«Զույգն ամուսնացել է երեք անգամ, բայց միայն առաջին՝ իսկական պսակադրության ժամանակ է Գոհար Վարդանյանը հագել հարսի շոր»,- նշված է հաղորդագրությունում:

Քանդակը բացվելու է երկուշաբթի օրը «Սառցե Մոսկվա» փառատոնի շրջանակում:

«Մենք չէինք կարող անտեսել Վարդանյանների բացառիկ ամուսնությունը, որոնք իրենց ողջ կյանքն աշխատել են ի շահ մեր երկրների, և ուզում ենք նրանց հերոսությունների մասին պատմել լայն հանրությանը»,- ասել է փառատոնի հեղինակ Ալենքսանդր Կովտունեցը:

Հիշեցնենք, որ Գոհար Վարդանյանը մահացել է նոյեմբերի 25-ին: Նա 93 տարեկան էր: Գոհար Վարդանանը թաղվել է Տրոեկուրովյան գերեզմանատանը՝ ամուսնու և մարտական ընկերոջ՝ Խորհրդային Միության հերոս Գևորգ Վարդանյանի կողքին, որը մահացել էր 2012-ին: