Հայաստանը միացել է ամերիկյան մի ալյանսի, որը լուրջ խնդիրներ կարող է առաջացնել չինացիների հետ հարաբերություններում. Սուրեն Սարգսյան

ԵՐԵՎԱՆ, 12 ՀՈՒՆԻՍԻ, Aysor.am: Հայաստանի Հանրապետությունը միացել է Միացյալ Նահանգների պետքարտուղարի կողմից նախաձեռնած «Համաշխարհային կրոնական ազատության» ալյանսին, Aysor.am-ի թղթակցի հետ զրույցում ասաց քաղաքագետ Սուրեն Սարգսյանը։

«Հայաստանը միացել է այդ ալյանսին, թեև այն ստեղծվել էր 2 տարի առաջ և 27 անդամ պետություն ունի։ Այս ալյանսի հաջորդ նիստը տեղի է ունենալու հուլիսին, և կարծում եմ, որ արդեն կլինի նաև Հայաստանի մասնակցությամբ՝ որպես անդամ պետություն», – ասաց քաղաքագետը։

Սուրեն Սարգսյանը դժվարացավ ասել՝ ինչ կստանա Հայաստանը մասնակցելով այդ ալյանսին կամ ինչի դիմաց է անդամակցությունը։

«Այս ալյանսը լուրջ անհանգստություն է առաջացնում Չինաստանի և Ռուսաստանի Դաշնության մոտ, որովհետև այս երկրներում կարծիք կա, որ ալյանսի հիմնական գործունեությունն ուղղված է լինելու հենց իրենց երկրների դեմ։ Չինացիները կարծում են, որ այն ուղղված է լինելու Տիբեթի խնդրի դեմ և անդամակցությունը մեզ համար լուրջ խնդիրներ կարող է առաջացնել չինացիների հետ հարաբերություններում», – տեղեկացրեց Ս.Սարգսյանը։

Նրա խոսքով՝ ալյանսի ապագան դեռևս կանխորոշված չէ կազմակերպության իրավական ձևի առումով, արդյոք դառնալու է միջազգային կազմակերպություն, թե՝ ոչ։

«Բայց այս ալյանսն իր խնդիրները լուծելու համար դիմելու է միջազգային կառույցներին. օրինակ՝ ՄԱԿ-ում է բարձրացնելու այն խնդիրները, որոնք տեսնելու է, որ կան այս կամ այն պետությունում՝ կրոնական ազատության հետ կապված և այլն», – ասաց Սուրեն Սարգսյանը։

Ավելի վաղ Սարգսյանն իր ֆեյսբուքյան էջում գրել էր. «Հայաստանն այսօր միացել է այս ալյանսին: Մերոնք պաշտոնապես դեռ չեն հայտարարել: Չինաստանն այս ալյանսը համարում է լուրջ հակաչինական կառույց: Հիմա ինձ հետաքրքիր է: Եթե ալյանսը հակաչինական հայտարարություն է տարածում, մենք դրա տակ ստորագրո՞ւմ ենք»։